Jelide qazaqstandyq úsh qyzdyń Ystanbuldaǵy meiramhanalardyń birinde tóbeles ortasynda júrgen videosy tarady, dep habarlaidy Sputnik.
Videoda birneshe er adamdyń qyzdyń shashynan súirep, syrtqa shyǵaryp jatqany túsirilgen. Túrik basylymdarynyń habarlaýynsha, keiin qazaqstandyq boijetken qamaýǵa alyndy.
Túrkiianyń Milliyet basylymynyń habarlaýynsha, oqiǵa bolǵan kúni qazaqstandyq qyz ben onyń advokaty resmi málimdeme jasady. Boijetkenniń sózinshe, ol qurbysy Ulbolsyn Malǵajarovamen birge ol jerge kóńil kóterý úshin barǵan. Alaida olardy jeńil júristi qyz dep oilaǵan meiramhana qyzmetkeri qyzdardyń telefon nómirin suraǵan. Alaida qyzdar nómirin berýden bas tartqan.
"Ol qurbymnyń basynan uryp, sodan keiin ishke alyp ketip, uryp-soǵa bastady. Men politsiianyń nómirin terip, olarǵa telefonymdy kórsettim. Sodan keiin olar meni de ura bastady. Qurbymnyń shashynan tartty, ekinshisi aýzyn ashýǵa tyrysty, sodan keiin qurbym amalsyz onyń qolyn tistep aldy", - deidi boijetken.
Sodan keiin Túrkiiada aspaz bolyp jumys isteitin Ulbolsyn Malǵajarovany politsiia alyp ketip, qamaǵan. Onyń advokaty Nebikan Orhan sotqa aqparat pen videony jinap, qamaýdan bosatýdy surady.
"Klientim qamaýda otyr. Olar 3-4 ret telefon suraǵan, soǵan bailanysty janjal shyqqan. Dárethanaǵa bara jatqanda taǵy da nómirin suraǵan. Qyz sol kezde shaǵym túsiremin dep telefonyn shyǵarǵan, ol telefonyn tartyp alǵan. Videoda bir er adamnyń meniń klientimniń shashynan ustap turǵany, al ekinshi kúzetshi eki qolyn aýzyna salǵany túsirilgen. Qazir qamaýda otyrǵanyna bailanysty shaǵym túsirdik, múmkindik bola salysymen bosatady dep úmittenemiz", - dedi avdokat Nebikan Orhan.
Al Qazaqstannyń Túrkiiadaǵy tótenshe jáne ókiletti elshisi Abzal Saparbekuly jaǵdaiǵa bailanysty pikir bildirdi. Onyń sózinshe, másele boiynsha Qazaqstannyń Ystanbuldaǵy Bas konsýldyǵy ainalysyp jatyr.
"Bizge azamattarymyzdan shaǵym túspese de, jábir kórgen qyzdarymyzdy izdep taptyq. Qamaýdaǵy azamat boiynsha konsýldyq kómek kórsetip jatyr. Ystanbul qalasy ishki ister basqarmasy basshysy jáne oqiǵa bolǵan aýdandyq ishki ister basshysyna máseleniń ádil qarastyrylýy boiynsha talap jetkizildi. Azamattarymyzdyń quqyǵyn qorǵaý jumystary júrgizilýde", - dep jazdy Saparbekuly.
"Árine kinási bar-joq ekenine qaramastan qyz balaǵa mundai zorlyq-zombylyq úshin ókinish bildirip jatqan túrik aǵaiyndar da óte kóp. Sabyr saqtap, jekelegen adamdardyń áreketi úshin búkil halyqty aiyptaýdan aýlaq bolaiyq", - dep jazdy Qazaqstannyń Túrkiiadaǵy elshisi.
