Qazaq tilinde túsirilgen mýltfilmderdi YouTube arnasyna kóbirek jariialaý qajet. Bul týraly Qazaqstannyń animatsiialyq kinostýdiialary qaýymdastyǵynyń tóraǵasy Jánibek Orazaly QazAqparat tilshisine aitty.
«Bizde bilikti mamandar bar. Endi qarjylandyrý tiisti deńgeide bolsa, jylyna 2 tolyqmetrajdy, 10 qysqametrajdy mýltfilm shyǵarý múmkindigi jasalady. Bul turǵyda «Balapan» arnasynda óndiriletin ónimderdi qosyp otyrǵan joqpyn. Al «Balapan» telearnasynda jylyna óz aldyna 200-300 minýttyq animatsiialyq filmder jasaýǵa qaýqary bar», - dedi J. Orazaly.
Onyń sózine qaraǵanda, búginde «Balapan» arnasyndaǵy sapaly ónimder balalardyń edáýir qyzyǵýshylyǵyn týdyryp keledi.
«Jalpy, balalarǵa ekranda kórsetiletin filmder ózindik áserin tigizetini belgili. Sondyqtan «Balapan» arnasynda kórsetiletin animatsiialyq filmder sanyn jyl saiyn arttyrǵan durys. Jasyryn emes, búginde balalar «YouTube» kanalyndaǵy mýltfilmderdi kóp tamashalaidy. Sondyqtan qazaq kórermenderdi joǵaltpaimyz desek, qazaq tilinde túsirilgen sapaly ónimderdi «YouTube» kanalyna kóbirek salǵan durys bolady. Balalar «YouTube» kanalynan qazaqsha mýltfilderdi tappaǵannan keiin, sheteldik ónimderdi izdei bastaidy», - dedi qaýymdastyq tóraǵasy.
