YONHAP Koreia Aqparat agenttiginiń jahandyq strategiia tobynyń jetekshisi Jýn Syn Li óz elindegi aqparattyq saiasatta internet-platformalardyń basymdyǵyn paidalanýdyń mańyzy týraly pikirin bildirdi, dep habarlaidy QazAqparat.
«Osydan 40 jyl buryn qurylǵan YONHAP jańalyq agenttigi – Koreianyń mediakeńistiginde ortalyq aqparat quraly boldy. Áý bastan kompaniia basqa da jańalyq agenttigi sekildi radio jáne televiziialyq, mátin kúiindegi jańalyqtardy jergilikti deńgeide taratyp otyrǵan. Osynaý artyqshylyqtar ondaǵan jyldar boiy YONHAP agenttigin eldegi negizgi jańalyq taratýshyǵa ainaldyrdy. Koreianyń barlyq jańalyq taratýshy uiymdary YONHAP agenttiginiń jańalyqtaryna súienip keldi. Ásirese el ishindegi jáne sheteldegi eń shuǵyl jańalyqtardy alyp otyrdy. Kompaniia ózgerip bara jatqan ýaqyttyń talaptaryna árdaiym beiimdelýge tyrysady», - dedi Jýn Syn Li Astana Media Week 2020 sharasynyń «Mýltiplatformalylyq» plenarlyq sessiiasynda.
Onyń aitýynsha, YONHAP osydan birneshe jyl buryn internet-platformalarda birqatar jańalyqtar arnasyn iske qosqan. Sonymen qatar agenttiktiń televiziialyq arnasy da ashylǵan.
«Bizdiń agenttiktiń Facebook, Instagram paraqshalary árdaiym aqparat taratyp otyr. Sonymen birge agenttiktiń Youtube-kontentine de suranys óte joǵary. Álem halqyna qoljetimdi bolýy úshin aqparatty aǵylshyn tilinde de taratamyz. Mediaplatformalardyń kómegimen turaqty ósim qarqynyn saqtap kelemiz. Koreialyq mádenietke qatysty aitar bolsaq, biz kontentti damytý úshin k-pop mýzyka aǵymynyń áleýetin paidalanamyz», - dedi ol.
