Foto:ttjk.info alyndy
Balalardy marapattaý, yntalandyrý qazir basty nazarda. Fizika, himiia siiaqty pán olimpiadalarynda medal alǵan oqýshylar tańdaǵan ýniversitetine grant alady, aqshalai syiaqysy jáne bar.«Biraq, halyqaralyq ǵylymi konkýrsqa qatysyp, ǵylymi joba qorǵaǵan balalarymyz eleýsiz qalyp keledi. Olarǵa memleket tarapynan eshteńe berilmeidi. Naqty bir ǵylymi zertteýmen ainalysyp, tyńǵylyqty joba ázirlegen daryndy balalardy Oqý-aǵartý ministrligi nege qoldamaidy? Bular bolashaq ǵalymdar emes pe?», - degen edi jýrnalist Ońǵar Qabden.
Bul suraqqa jaýap QR Oqý-aǵartý ministrliginiń saitynda paida boldy. Jariialanǵan aqparatta halyqaralyq olimpiadalarda nátije kórsetken qazaqstandyq oqýshylar memleket tarapynan qandai syiaqy alatyny aitylǵan.
Álem boiynsha TOP-7 bedeldi olimpiadalarda júldeli oryn alǵan 26 qazaqstandyq oqýshy qarjylai syiaqy alady. Syiaqynyń jalpy somasy 77,5 million teńgeden asady.
2023-2024 oqý jylynyń qorytyndysy boiynsha elimizdiń ulttyq quramasy eń bedeldi álemdik pándik olimpiadalarda 2 altyn, 12 kúmis, 12 qola medal jáne bir diplom ielendi. Bul olimpiadalar: IMO (matematikadan), IPhO (fizikadan), IBO (biologiiadan), IChO (himiiadan), IOL (lingvistikadan), IGeO (geografiiadan) jáne IOI (informatikadan).
Talantty oqýshylardy qoldaý maqsatynda Memleket basshysynyń tapsyrmasymen 2022 jyldan bastap halyqaralyq olimpiadalardyń júldeli oryndardy ielengen oqýshylarǵa jáne olardy daiyndaǵan pedagogterge memleket tarapynan birjolǵy syiaqy taǵaiyndalǵan.
Altyn medal jeńip alǵan oqýshy 1500 ailyq eseptik kórsetkish (AEK) mólsherinde, kúmis medal úshin – 1000 AEK, qola medal úshin – 500 AEK mólsherinde aqshalai syiaqy alady. Al altyn medal iegerin daiyndaǵan pedagogke – bazalyq laýazymdyq ailyqaqy 26,5 eselengen mólsherinde; kúmis medal iegerin daiyndaǵan pedagogke – bazalyq laýazymdyq ailyqaqy 17,5 eselengen mólsherinde; qola medal iegerin daiyndaǵan pedagogqa – bazalyq laýazymdyq ailyqaqy 8,5 eselengen mólsherinde beriledi.
Sonymen qatar, halyqaralyq olimpiadalardyń jeńimpazdaryna qazaqstandyq JOO-nyń kez-kelgenine oqýǵa túsýge bilim granty beriledi.
Ótken jyly 23 oqýshy 65,6 mln teńge, 20 pedagog jalpy somasy 71,4 mln teńge birjolǵy syiaqy alǵan bolatyn. Jalpy 12 iri halyqaralyq jarysqa qatysqan 1218 qazaqstandyq oqýshynyń 603-i medal iegeri atandy. Iaǵni, álemdik dodalarda elimizdiń namysyn qorǵaǵan árbir ekinshi qatysýshy júldeli orynǵa ie boldy.
