Reseidiń "Iandeks.Dengi" kompaniiasy Qazaqstan Prezidenti Nursultan Nazarbaevtyń álemde biryńǵai kriptovaliýta engizý týraly ideiasyna qatysty pikir bildirdi, - dep habarlaidy RIA Novosti.
"Naryq mýltivaliýtalyq álemniń modelin qabyldady. Tehnologiia damyǵannan beri jáne elektrondyq aqsha aýdarymdary paida bolǵannan bastap valiýtany bir sátte-aq aiyrbastaýǵa bolady. Sondyqtan halyqta el ishinde jáne shetelde aqsha aýdarymdaryn jasaǵan kezde eshqandai qiyndyq týyndamaidy", - dedi RIA Novosti basylymyna kompaniia ókilderi.
"Kriptovaliýta jaily aitatyn bolsaq, bul ideiany engizý úshin quqyqtyq jaǵdai men ony retteý máselesiniń qaralýy mańyzdy. Qandai jaǵdai bolsyn, álemdi jańa modelge májbúrlep kóshirý múmkin emes. Sebebi bizdiń oiynshylarda (bankter, tólem júieleri, transulttyq kompaniialar) ondai qajettilik bolyp turǵan joq", - dedi kompaniiadaǵylar.
Eske sala keteiik, keshe Nursultan Nazarbaev álemde biryńǵai kriptovaliýta engizýdi usynǵan bolatyn. "Álemdik qarjy qurylymyn ózgertý qajettiligi týyp otyr. Halyqaralyq esep-aiyrysýdyń tólem birligin engizý máselesin qarastyratyn kez keldi. Kriptovaliýta álemdi infliatsiiadan jáne saýda qatynastaryndaǵy qatelikterden aýlaq bolýǵa kómektesedi. Valiýta qarapaiym, ashyq ári tutynýshylarǵa baǵynyshty bolýy kerek. Tsifrlandyrý, tehnologiialardyń damýyn eskeretin bolsaq, mundai birlik kriptovaliýta túrinde engizilýi kerek", - degen edi Nazarbaev Astanada ótip jatqan ekonomikalyq forýmnyń plenarlyq otyrysynda.
