Reseidiń Iakýtiia aimaǵynda Shyǵys federaldyq ýniversitetiniń (SVFÝ) 34 stýdentine koronavirýs juqty. Bul týraly aimaqtyń gýbernatory Aisen Nikolaev habarlady.
“Iakýtiiada bir kúnde 52 adamnan koronavirýs tabyldy. Onyń 34-i – SVFÝ stýdenti. Virýs taraý oshaǵy anyqtaldy. Ýniversitette stýdentter arasynda virýs qatty taramaidy dep úmittenemiz” dedi Nikolaev.
4 mamyrda SVFÝ jataqhanasynda bir stýdentten koronavirýs tabylǵan soń karantinge jabylǵan. Aisen Nikolaevtyń sózinshe, virýs juqtyrǵandarda simptom joq, temperatýra kóterilmegen.
Stýdentter virýsty qalai juqtyryp alǵany habarlanbady. Sáýirdiń sońynda Resei densaýlyq saqtaý ministrligi jáne bilim ministrligi medýniversitetterdiń joǵarǵy kýrs stýdentterin koronavirýs juqtyrǵandardy emdep jatqan aýrýhanalarǵa tájiribeden ótýge jiberý týraly sheshim qabyldaǵan. Qujatta stýdentter kelisken jaǵdaida ǵana jumysqa tartylatyny, olarmen eńbek kelisim-sharty jasalatyny aitylǵan. Ministrlik osy arqyly 40 myń stýdentti jumysqa tartpaq. Biraq keibir stýdent “jumystan bas tartsańdar, oqýdan shyǵaramyz” degen qorqytý bolǵanyn aitady.
8 mamyrdaǵy resmi derek boiynsha, Iakýtiia aimaǵynda 437 adamǵa virýs juqqan. Tórt adam qaitys bolǵan. Al búkil Reseide COVID-19 dertine shaldyqqandar 177 myńnan asyp ketti. 1600-den astam adam kóz jumdy.
