Qazaqstandyq kásipqoi boksshy Janqosh Turarov Nur-Sultanda ótkizgen jekpe-jegi jáne aldaǵy josparlary týraly bólisti, dep habarlaidy QazAqparat Sports.kz portalyna silteme jasap.
Janqosh Turarov shilde aiynda Nur-Sultanda ótken boks keshinde argentinalyq Maýro Godoidy úshinshi raýndta nokaýtqa jiberip, WBO tujyrymy boiynsha Inter-Continental chempiony atanǵan bolatyn. Degenmen, boksshy bul titýldy asa zor nátije dep eseptemeitinin aitty.
«Qarsylasym myqty edi. Jekpe-jektiń aldynda onyń reitingi menen joǵary boldy. Biraq birneshe ret soqqy alǵannan keiin qashqaqtai bastady... Buny (WBO Inter-Continental titýlyn – Red.) úlken jetistik dep baǵalaýǵa bolady dep oilamaimyn. WBO tujyrymy biynsha tolyqqandy álem chempiony bolǵan soń ǵana maqtanýǵa bolatyn shyǵar», - dedi boksshy.
Sondai-aq Janqosh aldaǵy josparlary týraly aitty.
«Qazir menedjerlerimmen jospar quryp otyrmyz. Kelesi jekpe—jegimdi kúzdiń aiaǵyna qarai ótkizgim keledi», - dedi ol.
Aita keteiik, shilde aiynyń 6-sy kúni elordadaǵy «Barys-Arena» kesheninde kásipqoi boks keshi ótip, onyń basty aiqasy Jańqosh Turarov (23-0, 16 KO) pen argentinalyq Maksimiliano Godoi (31-4-1, 16 KO) arasynda bolǵan edi.
Olardyń kezdesýi 10 raýndqa eseptelgen bolatyn. Biraq úshinshi raýndta ýaqytynan buryn aiaqtaldy. Turarov Godoidy nokdaýnǵa jibergen soń tóreshi onǵa deiin sanady. Degenmen, argentinalyq boksshy ornynan tura almady.
Bul - 28 jastaǵy Jańqosh Turarovtyń 24-shi jeńisi boldy. Ol qarsylastaryn 17 ret nokaýtpen jeńgen. Bir de bir ret jyǵylyp kórmegen.
Boks keshin britandyq MTK Global kompaniiasy men amerikalyq Top Rank uiymdastyrdy.
