قازاقستاندىق كەسٸپقوي بوكسشى جانقوش تۇراروۆ نۇر-سۇلتاندا ٶتكٸزگەن جەكپە-جەگٸ جەنە الداعى جوسپارلارى تۋرالى بٶلٸستٸ, دەپ حابارلايدى قازاقپارات Sports.kz پورتالىنا سٸلتەمە جاساپ.
جانقوش تۇراروۆ شٸلدە ايىندا نۇر-سۇلتاندا ٶتكەن بوكس كەشٸندە ارگەنتينالىق ماۋرو گودويدى ٷشٸنشٸ راۋندتا نوكاۋتقا جٸبەرٸپ, WBO تۇجىرىمى بويىنشا Inter-Continental چەمپيونى اتانعان بولاتىن. دەگەنمەن, بوكسشى بۇل تيتۋلدى اسا زور نەتيجە دەپ ەسەپتەمەيتٸنٸن ايتتى.
«قارسىلاسىم مىقتى ەدٸ. جەكپە-جەكتٸڭ الدىندا ونىڭ رەيتينگٸ مەنەن جوعارى بولدى. بٸراق بٸرنەشە رەت سوققى العاننان كەيٸن قاشقاقتاي باستادى... بۇنى (WBO Inter-Continental تيتۋلىن – رەد.) ٷلكەن جەتٸستٸك دەپ باعالاۋعا بولادى دەپ ويلامايمىن. WBO تۇجىرىمى بيىنشا تولىققاندى ەلەم چەمپيونى بولعان سوڭ عانا ماقتانۋعا بولاتىن شىعار», - دەدٸ بوكسشى.
سونداي-اق جانقوش الداعى جوسپارلارى تۋرالى ايتتى.
«قازٸر مەنەدجەرلەرٸممەن جوسپار قۇرىپ وتىرمىز. كەلەسٸ جەكپە—جەگٸمدٸ كٷزدٸڭ اياعىنا قاراي ٶتكٸزگٸم كەلەدٸ», - دەدٸ ول.
ايتا كەتەيٸك, شٸلدە ايىنىڭ 6-سى كٷنٸ ەلورداداعى «بارىس-ارەنا» كەشەنٸندە كەسٸپقوي بوكس كەشٸ ٶتٸپ, ونىڭ باستى ايقاسى جاڭقوش تۇراروۆ (23-0, 16 كو) پەن ارگەنتينالىق ماكسيميليانو گودوي (31-4-1, 16 كو) اراسىندا بولعان ەدٸ.
ولاردىڭ كەزدەسۋٸ 10 راۋندقا ەسەپتەلگەن بولاتىن. بٸراق ٷشٸنشٸ راۋندتا ۋاقىتىنان بۇرىن اياقتالدى. تۇراروۆ گودويدى نوكداۋنعا جٸبەرگەن سوڭ تٶرەشٸ ونعا دەيٸن سانادى. دەگەنمەن, ارگەنتينالىق بوكسشى ورنىنان تۇرا المادى.
بۇل - 28 جاستاعى جاڭقوش تۇراروۆتىڭ 24-شٸ جەڭٸسٸ بولدى. ول قارسىلاستارىن 17 رەت نوكاۋتپەن جەڭگەن. بٸر دە بٸر رەت جىعىلىپ كٶرمەگەن.
بوكس كەشٸن بريتاندىق MTK Global كومپانيياسى مەن امەريكالىق Top Rank ۇيىمداستىردى.
