Dúniejúzilik dopingke qarsy agenttik (WADA) sportshylarǵa COVID-19 qarsy vaktsina egýdi tabandy túrde usynady, dep habarlaidy Kyodo agenttigi.
Biylǵy jazda Tokioda ótetin Olimpiada oiyndarynda dopingke tapsyratyn test oń nátije kórsetý múmkin dep alańdap otyrǵan sportshylardy jigerlendirgen agenttik ekpeni «óz densaýlyǵy, ainalasyndaǵy adamdar men jalpy alǵanda, Japoniia turǵyndarynyń densaýlyǵy úshin» jasatýǵa shaqyryp otyr.
«COVID-19 virýsyna qarsy vaktsinanyń tyiym salynǵan tizimdegi qandai da bir zattar nemese ádisterden quralǵany nemese qandai da bir jolmen dopingke qarsy taldaýǵa áseri bar ekenin dáleldeitin esh málimet joq», - delingen WADA-nyń virýsqa qatysty qujatynda.
Agenttik barlyq qoljetimdi aqparatty baqylap, óz pikiri ózgergen jaǵdaida sportshylarǵa keńes berip, aqparattandyryp otyratynyn qosyp ótti.
Halyqaralyq Olimpiada komiteti (HOK) sportshylardy vaktsina egýge májbúrlenbeitinin, biraq olar «niettestikti tanytý» úshin ekpe saldyrtýy tiis ekenin málimdedi.
Britandyq The Telegraph gazeti ótken aida HOK-tiń Dúniejúzilik densaýlyq saqtaý uiymymen (DDSU) birlesip, Tokiodaǵy Olimpiada oiyndaryn ótkizý úshin oǵan qatysatyn barlyq sportshylardy vaktsinalaýdy uiymdastyryp otyrǵanyn jazdy.
«Kez kelgen vaktsina qaltyraý, ekpe salynǵan jerdiń aýyrsynýy siiaqty ýaqytsha fiziologiialyq reaktsiiany týdyrýy múmkin, biraq búginde ruqsat etilgen vaktsinalardyń sportshylardyń qandai da bir nátijeliliginiń turaqty tómendeýine soqtyratyndyǵyna esh dálel joq», - dep málimdedi WADA.
