Dúisenbi kúni Resei "Birinshi arnasynyń" "Vremia" baǵdarlamasy soǵysqa qarsy aktsiiaǵa bailanysty kútpegen jerden úzilip qaldy.
Tikelei efir kezinde bolǵan oqiǵanyń videosy áleýmettik jelide jappai tarap jatyr. Video kadrdan "Vremia" baǵdarlamasynyń júrgizýshisi Ekaterina Andreevanyń Batys sanktsiiasynyń saldaryn azaitýǵa arnalǵan úkimet jospary týraly aityp otyrǵany kórinip tur. Sol sátte onyń artqy jaǵyna belgisiz áiel júgirip shyǵyp, "Soǵysty toqtatyńdar, propagandaǵa senbeńder. Munda ótirik aitady" degen jazýy bar plakat ustap tura qalady da "Soǵysty toqtatyńdar!", "Soǵysqa jol joq!" dep aiqai salady.
Arada birneshe sekýnd ótkende baǵdarlama rejisseri efirdi úzip, ózge siýjetti qosyp jiberedi.
Keiinnen bul aktsiiany Birinshi arnanyń Marina Ovsiannikova degen redaktory jasaǵany, onyń aktsiiaǵa shyǵardan buryn Ýkrainadaǵy basqynshylyqty - qylmys, Reseidi - agressor el, Vladimir Pýtindi agressiiaǵa jaýap beretin adam dep atap, video úndeý ázirlep qoiǵany málim boldy.
Ovsiannikova úndeýinde "týys halyqtar arasyndaǵy soǵysty dereý toqtatýǵa" jáne eshteńeden qoryqpai, soǵysqa qarsy mitingige shyǵýǵa shaqyrǵan. "Bárimizdi birdei qamai almaidy", – dedi ol.
Ovsiannikova kóp jyl "Birinshi arnada" jumys istep, "Kreml propagandasymen ainalysqanyna" ókinetinin aitqan. "Ótirik habarmen orystardy zombilaýǵa qatysqanyma uialyp turmyn", - deidi úndeýinde.
Bul aktsiiadan soń Ovsiannikovany politsiia bólimine áketken. Ázirge oǵan advokattary kire almai otyr.
24 aqpanda Resei qarýly kúshteri Vladimir Pýtinniń buiryǵymen Ýkrainaǵa basyp kirip, izinshe Reseidiń túrli qalalarynda soǵysqa qarsy aktsiialar bastalǵan edi. Qazirge deiin 15 myńnan astam adam qamalǵan.
Soǵysqa qarsy aktsiiaǵa shyqqandarǵa Resei zańy boiynsha iri aiyppul salynady nemese qylmystyq jaýapqa tartylady.
