QR Sybailas jemqorlyqqa qarsy is-qimyl agenttigi óz qyzmetkerleri arasynda adaldyq kartasyn iske qosady, dep habarlaidy QazAqparat.
Bul týraly Kadr jumysy departamentiniń basshysy Nurlan Jaqsymbetov málimdedi.
«Shamamen kelesi aptada Agenttik qyzmetkerleriniń jeke adaldyq kartasyn iske qosamyz. Bul jeke is paraǵynyń ornyn baspaidy. Bul - qyzmetkerlerdi ádil, áleýmettik jaýapty, salaýatty jáne ádepti ómir saltyna yntalandyratyn jańa qural», - dedi N. Jaqsymbetov QR Sybailas jemqorlyqqa qarsy agenttiginde ótken brifingte.
Onda zańǵa baǵyný, qarjylyq jaýapkershilik, áleýmettik jaýapkershilik, etika jáne ózin-ózi damytý dep atalatyn bes bólim bar. Ár bólimde 4-5 kórsetkish arqyly qyzmetkerlerge upai taǵaiyndalady.
«Ár qyzmetkerge senim krediti retinde 100 upai beriledi. Ony óz áreketimen kóbeitedi nemese azaita alady. Máselen, eger qyzmetker jol qozǵalysy erejesin buzyp, ákimshilik aiyppul alsa, 20 upai shegeriledi. Qoǵamdyq orynda daý shyǵarsa - 80 upai alynyp tastalady. Salyq, aliment, nesielerin ýaqytynda tólemese - 20 upai alynady. Jáne kerisinshe, shet tilin meńgerý deńgeiin kóterse - 10 upai, volonterlik jobaǵa qatyssa - 20 upai, oqytýshylyq qyzmetpen ainalyssa - 20 upai, sporttyq týrnirde júldeli oryn alsa - 10 upai qosylady», - dedi Agenttik ókili.
Qyzmetkerdiń jalpy upai sany 30-ǵa deiin tómendese, oǵan syiaqy berýde, mansaptyq kóterilýde nemese merziminen buryn ataq alýda shekteýler qoiylýy múmkin.
«Osylaisha, qyzmetkerlerdiń arasynda adaldyq pen ózin-ózi damytýdy, janashyrlyqty nasihattaǵymyz keledi», - dedi Nurlan Jaqsymbetov.
