Elordadaǵy Dostyq úiinde Qazaqstan halqy assambleiasynyń eriktiler ortalyǵy «Ashyq esik kúnin» ótkizdi, – dep habarlaidy QazAqparat. Ashyq esik kúninde QHA eriktiler qozǵalysynyń tujyrymdamasy tanystyryldy.
«Ashyq esik kúninde» túrli jastaǵy eriktiler qatysyp, óz tájiribesimen bólise alady. Eriktiler jyly barlyq oblystarda, Almaty, Shymkent jáne Nur-Sultan qalalarynda QHA eriktiler qozǵalysynyń ortalyqtary ashylýda. Onyń maqsaty – etnomádeni birlestikterdiń, azamattyq qoǵam institýttarynyń volonterlyq qozǵalysqa qatysýy. Ortalyq áleýmettik bastamalar men jobalardyń biryńǵai alańyna ainalady. Eriktiler arasynan úilestirýshiler arnaiy bekitildi», - dedi Nur-Sultan qalasy QHA hatshylyǵynyń meńgerýshisi Lázzat Qusaiynova.
Elordalyq QHA eriktileri 4 baǵytta – áleýmettik, bilim berý, sporttyq jáne mediatsiiadaǵy eriktilik boiynsha jumys isteidi.
«Áleýmettik baǵytqa «Nam tolko za 60» klýbynyń tóraǵasy, jýrnalist, ardagerler qozǵalysynyń belsendisi Tatiana Levchenko jetekshilik etedi. Olar áleýmettik mańyzdy jobalardy uiymdastyryp, halyqtyń áleýmettik osal toptaryna kómek kórsetedi. Bilim berý baǵyty – Nur-Sultan qalasy men Aqmola oblysynyń «Vozrojdenie» nemis qoǵamy QB tóraǵasynyń orynbasary Evgeniia Gizikke júkteldi. Olar oqýshylar arasyndaǵy kásiptik baǵdar, tálimgerlik jáne tárbie institýty, bilim berý mekemeleri janyndaǵy QHA jastar klýbtaryn damytady», - dedi L. Qusaiynova.
Sporttyq baǵyttaǵy eriktilik Qazaqstan Ginness rekordtar kitabynyń rekordshysy, belgili sportshy-palýan Sergei Tsyrýlnikovtyń jetekshiligine berildi. Joba sportshylar men jattyqtyrýshylardy bir qaýymdastyqqa biriktiredi. Olar birqatar sport túrleri boiynsha balalar úilerine, oqý oryndaryna baryp, sheberlik sabaqtaryn ótkizedi. Mediatsiiadaǵy eriktilik baǵytyn meditsina ǵylymdarynyń doktory, Qaraǵandy meditsina ýniversitetiniń professory Sáýle Qabieva basqarady. Mediator-eriktiler meditsinada, bilim berýde, TKSh-da otbasylyq, eńbek daýlaryn rettep, aldyn alý úshin qyzmet etedi. Mediator-eriktiler daýly jaǵdailardy taldap, janjaldardy sheshýge kómektesedi, ymyralasý rásimderin júrgizedi.
«Sonymen birge, elordalyq QHA Analar keńesiniń eńbegin erekshe atap ótkim keledi. Bul birlestik áielderdiń quqyqtyq saýatyn arttyrýmen, ata-ana qamqorlyǵynsyz qalǵan balalar máselesin sheshýmen ainalysady. Salaýatty ómir salty boiynsha qaiyrymdylyq klýbtary, onyń ishinde fitnes, ioga, at sporty jáne «Analar amanaty» qolóner shyǵarmashylyq ortalyǵy jumys isteidi. Analar keńesi QHA-nyń «Qaiyrymdylyq kerýenine», «Mektepke jol», «BI-Juldyzai» qaiyrymdylyq aktsiialaryna qatysady. Iaǵni, eriktiler jyly jariialanbai-aq, eleýli sharýalardy atqardy», - dedi L. Qusaiynova.
Sondai-aq, eriktiler jyly aiasynda erteń Dostyq úiinde «Donor kúni» qaiyrymdylyq aktsiiasy ótedi. Saǵat 10:00-den 13:00-ge deiin astanalyqtar óz erkimen qan tapsyryp, adam ómirin saqtap qalýǵa jáne volonterlik qyzmetke atsalysa alady.
.jpeg)