QR Bilim jáne ǵylym ministrligi men QR Aqparat jáne qoǵamdyq damý ministrligi arasynda «Áleýmettik stýdenttik kredit» jobasyn iske asyrý aiasynda yntymaqtastyq týraly memorandýmǵa qol qoiyldy, dep habarlaidy "Ult aqparat".
Resmi sharaǵa Bilim jáne ǵylym vitse-ministri Fatima Jaqypova, QR Aqparat jáne qoǵamdyq damý vitse-ministri Daniiar Esin, «Ulttyq volonterlik jeli» qaýymdastyq nysanyndaǵy ZTB atqarýshy direktory Tatiana Mironiýk, «Qarjy ortalyǵy» AQ prezidenti Asqar Ibraimov, «Azamattyq bastamalardy qoldaý ortalyǵy» komertsiialyq emes AQ basqarma tóraǵasy mindetin atqarýshy Gúlbaný Zamanbekova qatysty.
Aita keteiik, QR Tuńǵysh Prezidenti – Elbasy N.Nazarbaev 2019 jyldy «Jastar jyly» dep jariialady. Osyǵan orai stýdentterdi áleýmettik jáne qoǵamdyq paidaly qyzmetke keńinen tartýǵa baǵyttalǵan «Áleýmettik stýdenttik kredit» jobasy bastalady.
Joba aiasynda joǵary oqý oryndarynyń stýdentteri aqshalai syiaqy alyp, qoǵamdyq paidaly jumys nátijeleri úshin akademiialyq kreditterdi qaita esepke ala alady.
Stýdentter volonterler retinde balalar úilerinde, qarttar úilerinde, bilim berý jáne basqa da áleýmettik mekemelerde kómek kórsetedi. «Áleýmettik stýdenttik kredit» jobasyn iske qosý 2019 jyldyń qyrkúiek aiyna josparlanǵan, al onyń taqyryptyq modýli «Qazvolunteer.kz» volonterlerdiń biryńǵai internet tuǵyrnamasynda ornalasady.
Vitse-ministr D. Esin volonterlerdiń biryńǵai internet platformasy «Qazvolunteer.kz» QR Aqparat jáne qoǵamdyq damý ministrligi «Ulttyq volonterlik jeli» ZTB-men birlesip ázirlegenin eske saldy. Onlain-tuǵyrnama qazvolunteer.kz volonterlik qyzmetke qatysýshylardyń ózara is-qimyl tetikterin qurýǵa, Qazaqstannyń volonterleri men volonterlik uiymdarynyń qyzmetin úilestirýge, volonterlik jobalardy/baǵdarlamalardy/aktsiialardy aqparattyq qoldaýdy júzege asyrýǵa múmkindik beredi. Tuǵyrnamada kez kelgen adam onlain-tirkeýden ótip, volonterlik qyzmetke qosyla alady. «Búginde tuǵyrnamada 1,4 myńnan astam tirkeldi, sondai-aq 60-tan astam volonter uiymdary jumyldyryldy», - dedi Daniiar Esin.
«Qarjy ortalyǵy» AQ departamenti direktorynyń orynbasary Aqjol Qurmanseiittiń sózine qaraǵanda, bul bastama volonter jastardy qoldaý maqsatynda, JOO-da kúndizgi bólimde oqyp jatqandardyń shákirtaqysyn 30 paiyz deńgeiinde kóterý baǵytynda iske asyrylady.
«Osy negizde elimiz boiynsha biyl 10 myń tarta jas azamatty qamtimyz degen josparymyz bar. Aldaǵy jyly olardyń sany 44 myńǵa jetkizilmek, sondai-aq odan keiingi jyldary jobanyń qatysýshysy retinde 50 myń adamdy jumyldyrý eskerilgen. Erikti jastardy tek qana tegin jumys júrgizýge emes, sonymen qatar olardy yntalandyrý maqsatynda, iaǵni ýniversitette oqyp júrgen jastardyń elimizge tigizip jatqan paidasyn memleket tarapynan qoldaý turǵysynda júzege asyrylyp jatyr», - dedi A. Qurmanseiit.
Esterińizge sata keteiik, jyl basynda Elbasy Nursultan Nazarbaev Úkimetke volonterlikpen ainalysatyn JOO stýdentteriniń shákirtaqysyn 30 paiyzǵa arttyrýdy tapsyrdy.
