Taraz qalasynda joǵary liganyń áielder komandalary arasynda QR HHIH chempionaty márege jetti, dep habarlaidy "Ult aqparat".
Bes týrdyń qorytyndysy boiynsha BQO-nyń «Gratsiia KZ» komandasy 60 upaimen birinshi orynǵa ie boldy.
Oraldyqtardan bir ǵana upai kem jinaǵan «Taraz» komandasy kúmis júldeger atansa, «Qostanai» klýby (55 upai) úzdik úshtikti túiindedi.
«Gratsiia KZ» komandasyn uzaq ýaqyt boiy ótken jyly ómirden ozǵan bilikti bapker Kóleńke Ǵubashev jattyqtyryp keldi. Onyń qolastynan Ulttyq liganyń áielder komandalary arasynda biyl besinshi ret el chempiony atanǵan óskemendik «Altaidyń» kapitany Sana Anarqulova, sonda oinap júrgen Zarina Seitqazinova syndy sheber voleibolshylar tárbielenip shyqty. Qazirgi kezde klýbqa onyń zaiyby Nursulý Ǵubasheva bapkerlik etýde.
«Biz joǵary ligada 2008 jyldan beri óner kórsetip kelemiz. Buǵan deiin úsh ret qola, eki dúrkin kúmis júldeger atanǵan edik. Biyl alǵash ret altyn júldege qol jetkizdik. Sondai-aq komanda Qazaqstan jazǵy spartakiadasynda 2015 jyly úshinshi, 2019 jyly ekinshi orynnan kórindi. Endi Ulttyq ligada da oinaityn kez keldi dep oilaimyn», dedi Nursulý Ǵubasheva.
