Voleiboldan Aziia chempiony atanǵan «Altai» klýbynyń oiynshylaryn jankúierler áýejaidan qarsy aldy, dep habarlaidy QazAqparat.
Tailandtyń Nakhonratchasima qalasynda áielder arasyndaǵy voleiboldan klýbtyq Aziia chempionatyna Qazaqstan atynan ShQO-nyń «Altai» jáne Taldyqorǵannyń «Jetisý» klýbtary qatysqan.
Chempionat qorytyndysy boiynsha altailyqtar birinshi oryndy jeńip alǵan bolatyn. Sondai-aq klýb voleibolshylary birqatar nominatsiiada úzdik dep tanyldy. Atap aitqanda, Sana Anarqulova – «Óte qundy oiynshy (MVP)», Madina Beket – «Úzdik libero», Kristina Belova – «Úzdik shabýylshy», Nadejda Kodola – «Úzdik oiynshy».
Búgin jarys jeńimpazdaryn Semei áýejaiynan jankúierler qoshemetpen qarsy aldy. Sportshylar jarysta jeńimpaz ataný ońaiǵa soqpaǵanyn jetkizdi. Sonymen qatar Tailandaǵy epidemiologiialyq jaǵdaiǵa bailanysty qoiylǵan qatań shekteýler de qiyndyq týyndatqan.
«Jarystyń alǵashqy kúninen bastap oqshaýlaýda boldyq. Bizge tipti qonaq úi nómirinen shyǵýǵa da ruqsat berilmedi. Ózara sóilese de almai qaldyq. Ár úsh kún saiyn PTR-test tapsyrdyq. Biraq osyndai qiyndyqtarǵa qaramastan qaida jáne ne úshin kelgenimizdi, aldymyzda qandai maqsat turǵanyn jaqsy bildik. El úmitin aqtaý úshin bar kúshimizdi saldyq», - dedi «Altai» VK kapitany Sana Anarqulova.
