Pavlodar qalasynda voleiboldan Ulttyq liganyń áielder komandalary arasynda Qazaqstan chempiony belgili boldy, dep habarlaidy "Ult aqparat".
Birinshilik sońynda «Altai» (Óskemen) jáne «Jetisý» (Taldyqorǵan) komandalary altyn júlde úshin talasty.
Tórt týrdyń qorytyndysy boiynsha qos komanda birdei upai jinap, ózara oiyndarda eki-ekiden jeńiske jetti. Plei-off básekesinde qai klýb eki jeńiske qol jetkizse, sol chempion bolatyn edi. Keshe óskemendikter tartysty oiynda taldyqorǵandyqtardy tize búktirdi – 3:2.
Búgingi match ta asa qyzý boldy. Birinshi partiia taldyqorǵandyqtardyń enshisinde ketti. Ekinshisinde óskemendikter ese qaiyrdy. Úshinshi partiiada da olar edáýir alda turǵan, biraq set sońyna taman qarsylastarynyń qýyp jetýine múmkindik berip qoidy. Degenmen 32:30 esebimen bul partiiada «Altai» basym tústi. Sońǵy set sońynda «Jetisýdiń» alda turǵanyna qaramastan, asa sátti oinaǵan serbiialyq maman Marko Grshichtiń shákirtteri jeńisti julyp aldy – 25:22. Esep – 3:1. Eń sheshýshi sátterde komanda kapitany, Oral voleibolynyń túlegi Sana Anarqulova oiyn tizginin qolyna ala bildi.
Osylaisha «Altai» besinshi ret el chempiony atandy.
«Almatydan» ailasyn asyrǵan soltústikqazaqstandyq «Qýanysh» komandasy qola júldeger atandy.
