Astanadaǵy "Abý-Dabi Plaza" kesheninde bolǵan tóbeles sheshildi, biraq áleýmettik jelilerde Astanaǵa aýyldardan kelgen jastardyń arandatýshylyq mándegi sózderi taralyp jatyr. Mundai pikirdi Májilistiń vitse-spikeri Vladimir Bojko aitty, - dep habarlaidy Tengrinews.kz.
"Virtýaldyq álemde óshpendilik pen ashý, ekstremizm men radikalizm, ótirik basym bolyp tur. "Abý-Dabi Plaza" qurylysynda bolǵan tóbelesti aitatyn bolsaq, IIM, UQK jáne Astana ákimdigindegilerdiń arqasynda bul másele der kezinde sheshildi", - dedi Vladimir Bojko Parlamenttiń tómengi palatasynyń úkimettik saǵaty barysynda.
"Sondai-aq, áleýmettik jelilerde oidan shyǵarylǵan jáne shyndyqqa janaspaityn arandatýshylyq mándegi málimetter taralyp jatyr. Ondai pikirlerdiń basym bóligi aýyldardan kelgen jastardan, ózderine laiyqty aqsha beretin jumys tabýǵa qinalyp júrgen jastardan kelip jatyr", - dedi depýtat.
Depýtattyń aitýynsha, osydan birneshe jyl buryn Astanadaǵy "Artem" bazarynda da bir áiel bastaǵan janjal tóbeleske deiin barǵan. "Bul jaǵdai da osyndai tóbelesterdiń sebepterin anyqtap, olardy joiý qajettigin kórsetti. Aýyldardan qalaǵa aǵylyp jatqan jastardyń sanyn azaitý kerek", - dedi Vladimir Bojko.
Eske salaiyq, 2 qyrkúiekte qurylysy júrip jatqan "Ábý-Dabi Plaza" kesheninde 20.35-te Úndistan azamattary men jergilikti jumysshylar men kúzetshilerdiń arasynda kishigirim kelispeýshilik bolǵan. QR Ishki ister ministrliginiń Memlekettik til jáne aqparat departamentiniń direktory Almas Sádýbaevtyń habaryna qaraǵanda, qaqtyǵys kúzetshiniń Úndistan azamatyn mas kúide nysannan shyǵarýǵa qarsy bolǵandyǵynan shyqqan. Keiin ol otandastaryn shaqyryp, kúzetshini uryp-soqqan, jergilikti jumysshylar oǵan jaqtasqan, saldarynan tóbeles bolǵan, oǵan shamamen 30 adam qatysqan.
