Premer-ministrdiń orynbasary Eraly Toǵjanov vaktsina saldyrý men PTR-test tapsyrý mindeti azamattardyń konstitýtsiialyq quqyǵyn buzbaitynyn málimdedi, dep habarlaidy "Ult aqparat".
Kúni keshe koronavirýstyń taralýyna jol bermeý jónindegi vedomstvoaralyq komissiia qyzmet kórsetý salasynda, ónerkásip kásiporyndarynda jáne ózge de 20 adamnan asatyn ujymdarda vaktsina saldyrý talabyn engizýdi usyndy. Al ekpeden bas tartqandar 7 kún saiyn PTR-test tapsyrýǵa mindetti bolady. Bas memlekettik sanitar dárigerdiń qaýlysynan keiin osy talaptar zańdy kúshine enedi.
«Mindetti vaktsinalaý týraly siz usynǵan sharalar is júzinde vaktsina almaǵandardy kemsitýshilikke ákep soǵady degen pikir bar. Buǵan ne deisiz? Bul vaktsinalaý pasporttary men PTR-test nátijelerin qoldan jasaýdy arttyrady dep eseptemeisiz be?», - dep suraq qoidy jýrnalist QR Prezidenti janyndaǵy Ortalyq kommýnikatsiialar qyzmetindegi brifingide.
Osy oraida, Eraly Toǵjanov Konstitýtsiialyq quqyq esh buzylmaǵanyn atap ótti.
«Birinshi kezekte, Konstitýtsiia boiynsha biz azamattarymyzdyń densaýlyǵynyń qaýipsizdigin qamtamasyz etýge mindettimiz. Sondyqtan qabyldanǵan mundai sharalar barlyq azamattarǵa emes, qyzmet kórsetý salasyna, kún saiyn kóptegen azamattarmen bailanysatyn adamdarǵa qatysty. Dál osy sanattaǵy adamdar kórsetiletin qyzmetke keletin azamattarymyzǵa úlken qaýip tóndirýi múmkin. Bir jaǵynan – jumysty toqtatpaý «Atamekenniń», kásipkerlerdiń ótinishi edi, biz qol ushyn sozdyq. Sondyqtan osyndai sheshim qabyldandy», - dedi Toǵjanov.
Eraly Toǵjanov meditsinalyq qarsy kórsetilimderdi qospaǵanda, adamdarǵa tańdaý erkindigi beriletinin aitty.
«Men ózim konstitýtsiialyq quqyqtardy buzýdy kórip otyrǵan joqpyn. Biz tańdaý usynyp otyrmyz. Eger adam vaktsinadan bas tartsa, onda PTR-testileýden ótýi kerek. Biz Úndistandaǵy, sondai-aq kórshi elderdegi jaǵdaidy eskere otyryp, qaýipke, úlken qaterge jol bere almaimyz. Biz azamattarymyzdyń densaýlyǵyna qaýip tóndire almaimyz», - deidi Toǵjanov.
Premer-ministrdiń orynbasary halyqty vaktsina saldyrýǵa úndedi. Respýblika boiynsha ekpeniń 2,4 million dozasy bar. Eki aptanyń ishinde taǵy eki million vaktsina jetkiziledi.
«Bul – erikti shara. Biraq jańa qaýip-qaterlerdi eskere otyryp, qosymsha sharalardy qabyldaýǵa týra keldi», - dedi Toǵjanov.
Onyń sózine qaraǵanda, koronavirýsqa qarsy vaktsina bar. Biraq ekpe salý sharalary baiaý júrgizilip jatyr. Endigi maqsat – kúnine 70 myń adamǵa vaktsina egý.
