Foto:elements.envato.com
Premer-ministrdiń orynbasary – saýda jáne integratsiia ministri Serik Jumanǵarin kóshi-qonǵa qatysty qazirgi jaǵdai týraly oiyn aitty, - dep habarlaidy Tengrinews.kz agenttigi.
Resei azamattarynyń legi týraly aita kele, vitse-premer qazaqstandyqtardy dúrbeleń týdyrmaýǵa shaqyrdy.
"Keiingi jyldary bizge tek "qara aqqýlar" ushyp kelip jatyr. Ol jaqsy ma, jaman ba degen suraqtarǵa birjaqty jaýap berý qiyn. Men Ózbekstanda boldym, kelesi jyldyń qysy men kóktemine kókónis satyp alýǵa kelistik. Onda da adamdar kóp. Onda da baiqalady. Adamdar jaqsy ómir súrip jatqandyqtan kelmeidi.
Eń aldymen, azamattarymyzdyń ómir súrý jaǵdaiy qandai da bir jolmen nasharlamaýy úshin teńgerimdi esepteimiz. Al qalǵanynyń bárinde - jaǵdaidyń damý faktisine súienemiz. Kóbisi Qazaqstan arqyly tranzitpen júredi, bul olar osynda qalady degendi bildirmeidi. Sondyqtan jaǵdaidy baqylap, ázirshe úrei týǵyzbaý kerek", - dedi Jumanǵarin Úkimet kýlýarynda.
Vitse-premer ázirge azyq-túlik baǵasynyń ósýi baiqalmaǵanyn aitty.
"Men monitoring júrgizip jatyrmyn. Azyq-túlikke jatpaityn taýarlarǵa qatysty, negizinen, halyq tutynatyn taýarlarǵa qatysty bolmashy máseleler bar, sondyqtan jiyn ótkizemiz", - dep túiindedi ol.
"Qara aqqý" termini boljaý múmkin emes, biraq tarih baǵytyn túbegeili ózgertetin belgili bir mańyzdy oqiǵalardy bildiredi. Teoriianyń avtory – livandyq ǵalym Nassim Nikolas Taleb. Onyń dál osylai atalatyn kitaby bar.
