QR Eńbek jáne halyqty áleýmettik qorǵaý vitse-ministri Aqmadi Sarbasov karantinge bailanysty jumysy áli bastalmaǵan kásiporyndarda qyzmetkerlerge jalaqysy tóleý máselesin sheshý joldaryn atady, dep habarlaidy QazAqparat.
Onyń atap ótýinshe, karantindik sharalar jaǵdaiynda jumysyn qaita bastaýyna ruqsat etilmegen jumys berýshilerdegi qyzmetkerlerdiń jumysyn uiymdastyrýǵa jáne olardyń eńbegine aqy tóleýge qatysty máseleler týyndaǵan. Osyǵan bailanysty qoldanystaǵy eńbek zańnamasynda óndiristik qyzmetke qatysty tolyqqandy shekteýler bolǵan jaǵdaida, eńbek qatynastaryn resimdeýdiń birneshe nusqalary qarastyrylǵan.
Birinshi - qashyqtyqtan jumys isteý tártibi. Qashyqtaǵy jumys sharttary eńbek shartyna qosymsha kelisimderde belgilenedi. Al jumys berýshi qyzmetkerdi qajetti bailanys quraldarymen qamtamasyz etýi kerek.
Ekinshi - tolyq emes jumys kúni. Jumys berýshi tolyq emes jumys kúnin (kúndelikti jumys (jumys aýysymy) uzaqtyǵynyń normasyn azaitý, tolyq emes jumys aptasy ne osy eki nusqada) belgileýge quqyly.
Úshinshisi - aqysy tólenbeitin demalys. Oǵan qyzmetkerdiń bastamasy boiynsha jáne jumys berýshiniń kelisimimen ǵana ruqsat etiledi.
Tórtinshi - jumys berýshi men qyzmetkerdiń baqylaýyna jatpaityn jaǵdailarǵa bailanysty toqtap turýdy resimdeý. Toqtap turý 1 eń tómengi jalaqydan, iaǵni 42 500 teńgeden kem bolmaityn mólsherde tólenýi kerek.
«Biz shekteýlerdiń bar ekenin túsinemiz, biznes tolyq kólemde óndiristik qyzmetin júzege asyra almaýda. Sondyqtan, osy múmkindikti paidalana otyryp, barlyq adal jumys berýshilerge belsendi azamattyq ustanymy, qyzmetkerleri úshin áleýmettik jaýapkershiligi men jumys oryndaryn saqtap otyrǵan úshin alǵys aitqym keledi», – dedi Aqmádi Sarbasov Ortalyq kommýnikatsiialar qyzmetindegi brifing barysynda.
