QR Eńbek jáne halyqty áleýmettik qorǵaý vitse-ministri Nurjan Áltaev jumysshylarynyń ailyǵyn ósirip jatqan kásiporyndardy atady, dep habarlaidy QazAqparat tilshisi.
«Elbasy biylǵy Joldaýynda 2019 jyldyń 1 qańtarynan eń tómengi jalaqyny 28 myńnan 42 myń teńgege deiin arttyrý tapsyrmasyna bailanysty biz QR 2019-2021 jyldarǵa arnalǵan tiisti qujatqa ózgeristerdi engizdik. Ol qujat qazirgi tańda Májiliste qaralyp jatyr. Jýyq arada ol ózgerister respýblikalyq biýdjettik komissiiada qaralyp, tiisti qarajat bólindi. Meniń oiymsha, osy jyldyń jeltoqsanynda atalmysh zań qabyldanatyn bolady», - deidi Nurjan Áltaev elordadaǵy «Nur Otan» partiiasy bastaýysh uiymdarynyń respýblikalyq forýmynda.
QR Eńbek jáne halyqty áleýmettik qorǵaý vitse-ministriniń aitýyna qaraǵanda, Memleket basshysynyń tapsyrmasyna sáikes, biýdjettik uiymdarda eńbek etetin 275 myń azamattyq qyzmetkerdiń ailyǵy kóteriletin bolady.
«Olardyń ailyǵy shamamen 35 paiyzǵa ósedi. Azamattyq qyzmetkerlerdiń ailyǵyn arttyrý baǵytyn qarjylandyrý úshin 2019-2021 jyldarǵa arnalǵan biýdjetten jyl saiyn 86 mlrd teńge qarastyrylatyn bolady», - dedi ol.
Vitse-ministr jalpy, eń tómendi ailyq mólsheriniń ósimi ekonomikanyń ártúrli sektorynda eńbek etetin 1 mln 300 myń adamnyń ailyǵyn ósirýge septigin tigizetinin atap ótti. Onyń aitýynsha, qazirgi ýaqytta ailyǵy tómen jumysshylardyń jalaqysyn kóterý boiynsha iri kásiporyndarmen jumys júrgizilýde. Nurjan Áltaev óz sózinde ailyǵy tómen jumysshylardyń eńbekaqysyn kóterý mindetiniń júzege asyrylýyn baqylaityn shtabtar qurylyp jatqanyn aityp berdi.
«Monitoring jumysy kórsetip otyrǵandai, elimizdegi kóptegen iri kásiporyndar Memleket basshysynyń bastamasyna qoldaý bildirip, óziniń jumysshylarynyń ailyǵyn kóterip jatyr. Jergilikti atqarýshy organdardyń málimetine súiensek, osy jyldyń 12 qarashasyndaǵy jaǵdai boiynsha respýblikada 1 myńnan astam kásiporyn 75 myń jumysshynyń ailyǵyn kóterýge daiyn ekenin bildirgen. Máselen, 2019 jyldyń 1 qańtarynan bastap, «IRJ» kompaniiasy qyzmetkerleriniń ailyǵy 9-dan 25 paiyzǵa ósedi. Sol sekildi Shyǵys Qazaqstandaǵy «QazMyrysh» kompaniiasy ártúrli mamandyqtar boiynsha jumysshylarynyń kiris mólsherin 3-ten 20 paiyzǵa deiin kótermek. «Arselor Mittal Temirtaý» kompaniiasynyń ailyǵy 8-10 paiyzǵa artsa, Qyzyordadaǵy «Aral Tuz» kompaniiasy óz jumyskerleriniń ailyǵyn 20 paiyzǵa ósiredi. Qaraǵandy oblysynda da ákimdikter bul baǵytta kásiporyndarmen kelisimge kelýde», - dedi Nurjan Áltaev.
Eske sala ketsek, elordada búgin «Nur Otan» partiiasy bastaýysh uiymdarynyń respýblikalyq forýmynyń birinshi kúni ótti. Is-sharaǵa elimizdiń barlyq óńirlerinen kelgen 600-den astam delegat qatysýda. Olardyń qatarynda bastaýysh partiia uiymdary men aimaqtyq partiia filialdarynyń basshylary, belsendi partiia músheleri bar. Odan bólek, forýmǵa belgili otandyq jáne sheteldik sarapshylar, Úkimet músheleri, Parlament depýtattary arnaiy qatysyp, partiia jumysyn jan-jaqty jandandyrý máselesin talqylaýda.
