Sýmen jabdyqtaý protsesterin avtomattandyrý qajet. Bul týraly QR Indýstriia jáne infraqurylymdyq damý birinshi vitse-ministri Qaiyrbek Óskenbaev aitty, dep habarlaidy QazAqparat tilshisi.
«Aýyz sý tapshylyǵy sebepteriniń biri sýǵa salǵyrt qaraý bolyp tur. Bul óz kezeginde ótkizý baǵasy tómen bolǵan kezde tutyný kóleminiń joǵary bolýyna sep boldy. Tarif qalyptastyrýdyń áleýmettik ádisi de sý arnalaryn qarjylandyrýdyń jetkiliksizdigine, soǵan orai júieniń jyldam tozýyna alyp keldi. Osy jait apattar sanynyń artýyna, sýdyń bosqa shyǵyndalýyna jáne onyń sapasynyń nasharlaýyna jol ashty. Osyǵan orai bizge sýdy paidalaný jáne onyń qunyn qaitadan baǵalaý qajet», - dedi ol Májilistegi dóńgelek ústel barysynda.
Onyń atap ótýinshe, sý resýrstaryn únemdeý maqsatynda sýmen jabdyqtaý, sý burý jáne tazartý júiesiniń óndiristik qurylystarynyń protsesterin avtomattandyrý qajet. Aýyz sý tutyný normasyn qaita qarap, esepke alý aspaptaryn ornatý is-sharalaryn qolǵa alý kerek.
«Máselen, Shymkent qalasynda sý arnalaryn tolyqtai avtomattandyrý, sý kózinen tutynýshyǵa deiin esepke alý aspaptaryn ornatý esebinen 23 jyldyń ishinde bir adamnyń sý tutyný kólemi táýligine 456 litrden 121 litrge deiin qysqardy. Bul shamamen 40 mlrd teńgeni únemdeýge múmkindik berdi. Sonymen qattar «Astana sý arnasyn» avtomattandyrý esebinen úsh jylda 523 mln teńge únemdeldi. Ol negizinen elektr energiiasy shyǵyndarynyń qysqarýy, jelilerde apatty jaǵdailardyń tómendeýi esebinen boldy. Osyǵan orai jergilikti atqarýshy organdar kásiporyndarmen birlesip, joǵaryda atalǵan is-sharalardy júzege asyrý ishin naqty sharalardy qabyldaýy tiis», - dedi birinshi vitse-ministr.
