- QR Din isteri jáne azamattyq qoǵam vitse-ministri Berik Arynnyń aitýynsha, osydan úsh jyl buryn qabyldanǵan erejege sáikes, namazxanalar memlekettik organdardan úsh júz metr shalǵai jerde ornalasýy tiis. Alaida bolashaqta atalǵan erejege ózgerister engizilýi ábden múmkin, dep xabarlaidy QazAqparat tilshisi.
«Bul ereje 2013 jyly qabyldanǵan bolatyn. Ol kezde Din isteri agenttigi bolǵan. Sol erejege sáikes, quqyq qorǵaý, áskeri jáne taǵy basqa memlekettik organdardyń 300 metrlik radiýsynda sondai dini oryndar (namazxanalar -avt.) ornalaspaýy kerek. Endi, ýaqyt ózgerip jatyr ǵoi. Mysaly, keibir jerlerde ol ornalasqannan keiin onda basqa bir mekemeler ashylyp jatyr. Mysaly, osyǵan bailanysty Astana qalalyq din isteri basqarmasy tekseris júrgizip, sol normalardyń oryndalýyn qadaǵalap otyrady», - dedi B.Aryn QazAqparat tilshisine bergen suxbatynda.
Onyń aitýynsha, búginde ministrlik ókilderi áleýmettik jelilerde xalyqtyń namazxanalardyń jabylýyna qatysty alańdaýshylyǵyn kórip, bilip otyr. Osyǵan bailanysty aldaǵy ýaqytta erejege ózgerister engizilýi ábden múmkin.
«Biz osy máselege qatysty barlyq usynystardy qarap jatyrmyz. Bolashaqta erejelerge ózgerister engizilgen kezde sol usynystardyń barlyǵyn qaraimyz. Dál qazir tek sol erejege sáikes kelmeitin namazxanalar ǵana jabyldy. Degenmen, árbir fakti boiynsha tekseris júrgiziledi», - dep atap kórsetti vitse-ministr.
Aita keteiik, «Dini qyzmet jáne dini birlestikter týraly» zańdy túsindirýge arnalǵan búgingi baspasóz máslixatynda Berik Aryn destrýktivti aǵym ókilderiniń imamdarmen daýlasyp, meshitke kelýshilerdi qorqytyp jatqanyn jetkizdi. Osy oraida ol dereý politsiiaǵa xabarlasýǵa keńes berdi. Sebebi ondai áreketter zańmen qýdalanady.
Budan bólek, vitse-ministri «Memlekettik qyzmetshilerge juma namazyna barýǵa ruqsat bar ma?» degen suraqqa jaýap berdi.
