Bilim jáne ǵylym vitse-ministri Sholpan Karinova L.Gýmilev atyndaǵy Eýraziia ulttyq ýniversitetinde muǵalimniń ústine tóbe taqtaishasy qulap ketip, ol sabaǵyn ótize almaǵan jaǵdaiǵa qatysty pikir bildirdi, dep habarlaidy "Ult aqparat".
«Muǵalimde bári jaqsy. Eshqandai qýdalaý bolǵan emes. Atalǵan muǵalimdi (Dana Kópejanova-avt) sabaqty ótkizbei qoidy dep eshkim jazalaǵan joq. Eshqandai jaza bolmaidy da. JOO-nyń, Bilim jáne ǵylym ministrliginiń ustanymy osyndai. Jalpy, stýdentter úshin de, muǵalimder úshin barlyq jaǵdai jasalyp jatyr. Sondyqtan, muǵalim eshqandai sebep boiynsha qýdalanbaidy», - dedi Sholpan Karinova OKQ-da ótken baspasóz máslihatynan keiin tilshilerdiń suraǵyna bergen jaýabynda.
Bilim jáne ǵylym vitse-ministri JOO oqytýshysynyń eshqandai sógis almaǵanyn habarlady.
Aita ketsek, osydan birneshe kún buryn BAQ-ta jáne áleýmettik jelilerde L.Gýmilev atyndaǵy Eýraziia Ulttyq ýniversitetiniń muǵaliminiń ústine kabinet tóbesiniń shaǵyn bóliginiń qulap ketkeni týraly video taraǵan bolatyn. Ondaǵy málimetterge súiensek, oqiǵadan keiin L.Gýmilev atyndaǵy EUÝ-niń saiasattanýy kafedrasynyń oqytýshysy Dana Kópejanova dárigerdiń kómegine júginýge zárý bolǵan. Alaida ýniversitettiń dispetcherlik qyzmety ony «kelesi sabaqty ótkizbedi» dep jazyp jibergen kórinedi.
Alaida keiin L.Gýmilev atyndaǵy Eýraziia Ulttyq ýniversiteti bul jaǵdaiǵa qatysty muǵalimniń jazalanbaitynyn habarlady.
