Eńbek jáne halyqty áleýmettik qorǵaý vitse-ministri Svetlana Jaqypova zeinetaqy shotyna ai saiyn eń tómengi jalaqynyń 10%-in aýdarǵan azamat memleketten qansha million teńge alatynyn eseptep berdi, dep habarlaidy Sputnik Qazaqstan tilshisi.
Jaqypova qarapaiym esepteý júrgizip, zeinetaqy qoryndaǵy shotyna bir million teńge salǵan azamat zeinet jasyna jetkende, neshe eselep qaitaryp alatynyn aitty.
"Keibireýler memleket halyqty tonaidy, zeinetaqy jarnasyn tóleýge májbúrleidi dep jazyp jatyr. Qarapaiym matematikalyq esepteý júrgizeiik. Máselen, azamat kelisimshart boiynsha zańdy túrde óziniń tabysyn 1 eń tómengi jalaqy sheginde kórsetti delik. Osy eń tómengi jalaqynyń 10%-i 2 824 teńgeni quraidy. Ol 30 jyl boiy ai saiyn 2 824 teńgeden tólep, 1 million 100 myń teńge jinaidy. 63 jasynda álgi azamat zeinetke shyǵady. Statistika boiynsha zeinetten keiingi ortasha ómir súrý uzaqtyǵy 17 jyldy quraidy. Biraq qazir biz on jyl dep alaiyq. Sonda ol on jyl boiy ai saiyn 28 824 teńge alyp turady. Iaǵni on jylda shamamen úsh million teńge alady, bir million saldy, al memleket oǵan úsh million qaitarady. Sonda bul memlekettiń azamattardy tonap jatqanyn bildire me? Bulai aitpas buryn, osyndai qarapaiym esepteý júrgizip, oilanyp kórińizder", — dedi vitse-ministr.
Jaqypovanyń aitýynsha, bazalyq zeinetaqydan bólek, jarna esebinen azamattyń zeinetaqy jinaǵy ulǵaiady.
"Iaǵni, bir million salǵan adam ol aqshany investitsiialyq tabyspen birge alady. Qazir sizder BJZQ-nyń berip otyrǵan investitsiialyq tabysy túk emes dep aitasyzdar. Biraq memleket barlyq azamatty zeinetaqymen qamsyzdandyrýǵa kepildik beredi – bazalyq zeinetaqy, yntymaqty zeinetaqy jáne aýdarylǵan jarnalardyń infliatsiia deńgeiinde saqtalýyna memlekettik kepil túrinde. Iaǵni, investitsiialyq tabys qansha bolsa da, eger ol infliatsiiadan tómen bolsa, osy aiyrmashylyqty memleket sizge tóleidi", — dedi vitse-ministr.
