Marat Qojaev / Foto: OKQ
Ishki ister ministriniń birinshi orynbasary Marat Qojaev Taldyqorǵanda óz kabinetinde qyz zorlady degen kúdikpen qamaýǵa alynǵan qalalyq Politsiia basqarmasynyń bastyǵyna qatysty pikir bildirdi, dep habarlaidy Sputnik Qazaqstan.
Qojaev Taldyqorǵanda politsiiaǵa basshylyq etken áriptesimen jeke tanysqan emespin deidi. Biraq ol adam tekseristen talai ret ótken.
“Uiat jaǵdai, ony moiyndaý kerek. Biraq ár adamnyń júregine, qanyna sińetin qasietterdi biz bile almaimyz. Ondai tehnologiia joq áli. Tekseristen talai ret ótti. Jańadan kelgen qyzmetker emes, talai jyl istep kele jatqan adam. Biraq osyndai nárseni istep qoidy. Jaýapkershiligin tergeý anyqtaidy, sotqa jiberiledi, sol kezde jazasyn alady”,-dedi Qojaev jýrnalisterge bergen suhbatynda.
Osy oraida jýrnalister qyz zorlaǵan basshynyń buǵan deiin óz qyzmetkerlerin balaǵattap, dóreki minez kórsetkenin eske saldy. Qojaevtyń sózine qaraǵanda, bunyń barlyǵy keshegi tekseris kezinde anyqtalyp otyr.
“Iá, ondai jaǵdailar bolǵan eken. Sol oqiǵa kezinde onyń laýazymy tómendetilgen, odan keiin qyzmetin atqara kele, myna laýazymyna taǵaiyndalǵan”, - dep atap kórsetti Qojaev.
Aita keteri, osy aptanyń basynda Taldyqorǵan qalalyq politsiiasynyń bastyǵy 27 jastaǵy qyzdy zorlady degen kúdikpen ustaldy. Keshe oblystyq politsiia deparatmentiniń basshylyǵy da jumystan bosatyldy.
