QR Qoǵamdyq damý ministrligi qoǵamdyq keńester quramynda jumystaryn laiyqty deńgeide atqarmaityn adamdardy shyǵarý kerektigin alǵa tartýda, dep habarlaidy QazAqparat.
«Bizge qoǵamdyq keńester men máslihattar qyzmetterin jikteý kerek. Olar kóp jaǵdaida máslihattar qyzmetin qaitalap júr. Shyn máninde máslihattarda naqty bilik bar, olar sheshim qabyldaidy, al qoǵamdyq keńes - ol konsýltativtik organ. Olar memlekettik organdarǵa keńes berip, monitoring júrgizýi tiis. Atap aitqanda, zańda qoǵamdyq keńester normativtik-quqyqtyq aktiler jobalaryn qarastyrýy tiis degen mindet eskerilgen, iaǵni bul máselede olar máslihattarmen qatar tur. Keńester qandai aktilerdi qarastyratynyn ózderi sheshýi tiis. Al zańnamada olar bul sharalarǵa mindettelgen», - dedi QR Qoǵamdyq damý vitse-ministri Sergei Konovalov Parlament Senatynda ótken otyrysta.
Onyń sózine qaraǵanda, Ekonomikalyq yntymaqtastyq jáne damý uiymy usynystaryna sáikes, qoǵamdyq keńesterde azamattyq qoǵam ókilderin 90 paiyzǵa deiin jetkizý kerek.
«Budan bólek, rotatsiia tetikteri bolýy tiis. Iaǵni, qoǵamdyq keńester quramyndaǵy keibir músheler ózderiniń mindetterin laiyqty deńgeide atqarmaidy. Osy oraida, ol jerlerde teńgerimsizdik týyndaidy. Bir-eki adam belsendi jumys istese, qalǵandary qol qýsyryp otyrady. Bul turǵyda keńes jumysynyń qadirin ketirýge bolmaidy», - dedi ol.
S. Konovalovtyń aitýynsha, atalǵan máseleler boiynsha usynystar eskerilip, olardy zańnamaǵa engizý qarastyrylýda.
Jalpy Qazaqstanda 229 qoǵamdyq keńes bar. Olardyń negizgi bóligi aýdandyq jáne qalalyq deńgeide. Keńester jumysyna 3 907 adam jumyldyrylyp, sonyń arasynda 22 paiyzy memorgannyń, 20 paiyzy úkimettik emes uiym ókili. Qoǵamdyq keńesterde 213 ákimniń, 16 ortalyq memorgan basshysy jáne 1,3 myńnan astam jergilikti atqarýshy organ esebi tyńdaldy.
