QR Úkimeti osy aptada reseilik benzinniń elimizge tasymaldanýyna ýaqytsha shekteýdi engizetin qujat qabyldaýy múmkin. Bul týraly Parlament Senaty Ekonomikalyq saiasat, innovatsiialyq damý jáne kásipkerlik turaqty komitetiniń keńeitilgen otyrysynnan keiin tilshilerge QR Energetika vitse-ministri Bolat Aqsholaqov málim etti, dep habarlaidy QazAqparat.
«Dizel otynyn shyǵarýǵa jáne Resei Federatsiiasynan benzinniń tasymaldanýyna shekteý sharalary osy aptada jariialanady», - dedi ol.
Vitse-ministrdiń aitýynsha, dizel otynynyń shyǵarylýyna ýaqytsha shekteý úsh ai merzimge bekitilmek.
Komitet otyrysy barysynda B. Aqsholaqov munai óńdeý zaýyttarynda jańǵyrtý jumystary aiaqtalǵannan keiin, AI-92 markaly benzini aitarlyqtai kóbirek óndirilip jatqanyn atap ótti.
«Bastapqyda strategiialyq qordy qurý sharalaryna ekpin qoidyq. Búginde ony táýlik saiyn tekserip otyrmyz. AI-92 benzini boiynsha 300 myń tonnadan kem emes deńgeige jetkizýge tyrysýdamyz. Búginde benzin artyǵymen óndirilýde. Qazirgi kezde 350 myń tonnadan astam qor jinaldy. Sonymen qatar, biyl atalǵan kórsetkishten asyra óndirý múmkindigimiz bar, iaǵni 500 myń tonna benzinge jetkize alamyz», - dedi vitse-ministr.
Onyń sózine qaraǵanda, Qazaqstanda aýyl sharýashylyǵy jumystaryn eskere otyryp, 4,5 mln tonnaǵa tarta dizel otyny qajet bolady. Aýyl sharýashylyǵy ministrligi egistik alqaptaryn keńeitýine bailanysty Energetika ministrligi fermeler qajettigine kóktemde dizel otynyn 380 myń tonnaǵa deiin arttyrady.
«Sáikesinshe, biyl 4,5-4,7 mln tonna dizel otyny óndiriledi. Iaǵni, otynnyń osy túri boiynsha qajettilikti tolyqtai qamtamasyz etemiz. Degenmen de maýsymdyq ózgeristerge bailanysty Reseiden 300 myń tonna dizel otynyn jetkizý múmkindigi bolady», - dedi ol.
Budan buryn habarlanǵandai, QR Energetika ministri Qanat Bozymbaev Qazaqstan dizel otyny eksportyna shekteý qoiatynyn aitty.
