QR Indýstriia jáne infraqurylymdyq damý vitse-ministri Amaniiaz Erjanov Armeniiadan jetkizilip jatqan avtokólikterge qatysty pikir bildirdi, dep habarlaidy QazAqparat tilishisi.
«Biz ózimizdiń aqparattyq arnalarymyz arqyly AQSh-tan Armeniiaǵa shamamen 60 myń avtokólik jetkizilgenin bilemiz. Endi olar bul kólikti elderine kirgizdi, bizde biryńǵai Kedendik tarif bar. Degenmen, olar kólikterdi ózderinde qaldyrýy tiis. Al barsha Kedendik odaqqa taratý úshin bizdiń azamattar Armeniiada ýaqytsha turǵylyqty jerdi rásimdep, Armeniianyń azamattarymen qatar osy mashinalardy satyp alady. Iaǵni eshbir qosymsha baj salyǵynsyz kólikterdi Qazaqstanǵa armiandyq nómirlerimen kirgizip, osynda emin-erkin júr», - dedi A. Erjanov Úkimet úiinde ótken baspasóz máslihatynda.
Onyń sózine qaraǵanda, bul óz kezeginde qazaqstandyq jol politseileri úshin problema týdyrady.
«Olardy jaýapkershilikke tarta almaidy. Atap aitqanda, osy nómirmen júrgen kólikter joldaǵy jyldamdyqty asyryp, jol erejesin buzsa da, osy úshin eshqandai jaýapkershilikke tartylmaidy. Sonymen birge, aiyppul tólemeidi, sotqa tartylmaidy. Mundai kólikter kóptep kirgizilse, onda bizdiń jeńil kólik óndirisin arttyrý boiynsha jumystarymyz jáne avtonesieleý boiynsha sharalarymyz bosqa qalady», - dedi vitse-ministr.
Onyń sózine qaraǵanda, Armeniiada avtokólikti eki ese arzan baǵamen alýǵa bolady. Sonymen qatar vitse-ministr osyndai avtomobilderdi satyp alýǵa qatysty memleket tosqaýyl qoimaitynyn atap ótti.
«Bul baǵytta qarsy sharalar qabyldanbaidy. Eger de el azamattary osyndai mashinalardy alǵysy kelse, onda qarsy qadamdardy qabyldaýdyń reti joq. Kerisinshe, osynyń barlyǵy zańdy bolýy úshin sheshim qabylaý kerek, iaǵni aldaǵy ýaqytta bizdiń azamattarda zań aldynda, quqyq qorǵaý organdary aldynda problemalary bolmas úshin. Armeniiada ýaqytsha tirkeýge turý arqyly mashina satyp alyp, ony elimizge tranzittik nómirmen kirgizý kerek emes. Odan da kólikti alyp kelip, tirkeýge qoiyp, zańdy túrde júrgen durys bolar. Óitkeni qazirgi kezde olar osynda da, Armeniiada da salyq tólep jatqan joq», - dedi ol.
