Ákimder halyqpen kezdesýde zaldy memlekettik qyzmetshilermen nemese biýdjet qyzmetkerlerimen toltyrmaýy tiis. Bul týraly QR Ulttyq ekonomika vitse-ministri Baýyrjan Omarbekov aitty, dep habarlaidy QazAqparat.
«Ákimderdiń qoljetimdiligine qatysty kóp syn aityldy. «Kórmeimiz», «Kezdese almaiyz», «Eseptik kezdesýde bolmasa basqa ýaqyt aldyna kirý múmkin emes» degen siiaqty syn kóp boldy. Bul (Prezidenttiń ákimderdiń halyqpen kezdesýlerin ótkizý týraly Jarlyǵy) sonyń aldyn alý úshin jasalyp otyr. Biz halyqtyń ýaqytyn da, qarajatyn da únemdeý maqsatyn alǵa qoidyq. Mysaly, elimizde oblys ortalyǵy men eldi mekenderdiń arasy 500-600 shaqyrymǵa deiin shalǵai. Endi oblys ákimderi aldaryna ózi kelip turǵannan keiin turǵyndardyń ýaqyty, qarajaty únemdeledi. Sonymen qatar kez kelgen turǵyn óziniń máselesin ákimmen tikelei bailanysta sheshýge múmkindik alady dep oilaimyn», - dedi vitse-ministr «Habar-24» telearnasyndaǵy «Suhbat» baǵdarlamasynda.
Sonymen qatar ol buǵan deiin ákimderdiń kezdesýin uzyn-sonar baiandamalarǵa, statistikalyq derekterge qurý derekteri bolǵandyǵyn da atap ótti.
«Sol sebepti bul máseleni de júielendirýge tyrystyq. Qazir Jarlyqta naqty kórsetilgen. Iaǵni, kezdesýdiń ary ketkende tórtten bir bóligi ǵana baiandama jasaýǵa arnalady. Baiandamada Qazaqstannyń jańa damý baǵyttaryn, aldaǵy josparlar jáne atqarylǵan jumystar boiynsha qysqasha aityp, kezdesýdiń negizgi bóligin suraq-jaýapqa beriledi», - dedi ol.
Baýyrjan Omarbekov endigi ýaqytta ákimdermen kezdesýde aldyn ala daiyndalǵan suraqtardyń bolmaitynyn aitty.
«Ákimderge jiberilgen jadynamada naqty kórsettik. Úlken zaldarǵa halyqty jinaý jáne ony memlekettik qyzmetshilermen nemese biýdjettik qyzmetkerlermen toltyrmaýy kerek. Ákimderdiń halyqpen kezdesýiniń ikemdi kúntizbelik jospary bekitilip, ol halyqqa aldyn ala jariialanady», - dedi vitse-ministr.
