Sailaý kúninde komissiia músheleri betperdeni 3 saǵat saiyn almastyrýy kerek. Bul týraly búgin QR Densaýlyq saqtaý vitse-ministri – Bas memlekettik sanitarlyq dáriger Aijan Esmaǵambetova aitty, dep habarlaidy QazAqparat.
«Tumaýdan basqa, elimizde ózge de virýsty infektsiialar anyqtaldy. Olar: rinovirýsty, resvirýsty, adenovirýsty, bokavirýsty, metapnevmovirýsty jáne paragripp. Respýblikamyzda jiti respiratorlyq virýsty infektsiia jáne tumaýmen syrqattanýdyń artýyn, koronavirýs infektsiiasy boiynsha jaǵdaidyń turaqty ekendigin eskere otyryp, sailaýdy ótkizý kezinde sailaý komissiiasy músheleri betperde tártibin saqtaýy, bir ret qoldanylatyn betperdeni ár úsh saǵat saiyn almastyrýy qajet», - dedi vitse-ministr Ortalyq sailaý komissiiasynyń otyrysynda.
Onyń atap ótýinshe, halyqtyń kóp jinalýyn boldyrmaý úshin barynsha keń bólmelerdi paidalaný qajet.
«Bólmelerdi jeldetý júiesi úzilissiz jumys isteýi kerek. Al jasandy jeldetý júiesi bolmaǵan jaǵdaida is-sharalardy ótkizý aldynda bólme aýasyn tazartý qajet», - dedi Aijan Esmaǵambetova.
