Astana-Premier Tech komandasy Aleksandr Vinokýrovtyń komandanyń sporttyq basshysy mindetin atqarý toqtatqanyn málimdedi, dep habarlaidy "Ult aqparat".
«Astana-Premier Tech komandasy Aleksandr Vinokýrovtyń komandanyń sporttyq basshysy mindetin atqarýyn toqtatatynyn habarlaidy. Komandanyń direktorlar keńesiniń bul sheshimine qaramastan, Vinokýrov Astana-Premier Tech komandasynyń qundy múshesi bolyp qala beredi. Biraq biraz ýaqyt basqarýshylyq mindetter atqarmaidy», - dep jazylǵan komandanyń resmi málimdemesinde.
Sondai-aq, resmi aqparatta Aleksandr Vinokýrovtyń ornyna kim keletini de aitylǵan.
«Jýyq arada komandanyń sport jetekshisi retindegi jaýapkershilikti Djýzeppe Martinelli men Stiv Baýer óz moinyna alady. Olar komandanyń kúndelikti sporttyq qyzmetin jumystaryn basqarýshy direktor Iana Zelmen birge úilestiredi», - dep jazylǵan Astana-Premier Tech taratqan málimette.
Osylaisha, «Týr de Frans» kópkúndigine Astana-Premier Tech komandasy Aleksandr Vinokýrovsyz qatysatyn boldy.
«Biz Aleksandr Vinokýrovtyń «Týr de Fransqa» qatyspaitynyn rastaimyz. Óitkeni ol komandanyń sport jetekshisi mindetin toqtatty. Aleksandr áli de komandanyń quramynda qala beredi. Tek komandanyń sporttyq operatsiialaryn basqarmaidy. Biraq basqa tapsyrmalardy oryndaýǵa aýysady. Osy kezeńde Djýzeppe Martinelli men Stiv Baýer komandanyń jarystarda óner kórsetýin úilestirip, Dmitrii Fofonov pen Stefano Zanini bastaǵan shabandozdardyń «Týr de Frans» jáne basqa da saiystarda tabysty óner kórsetýine múmkindik jasaidy dep úmittenemiz», – deidi Astana-Premier Tech basqarýshy direktory Iana Zel.
