QR Premer-Ministriniń orynbasary Berdibek Saparbaev Aqmola oblysyna jumys sapary barysynda Zerendi aýdanyndaǵy Viktorovka aýylynyń turǵyndarymen kezdesti, dep habarlaidy "Ult aqparat".
Vitse-premer aldymen Viktorovka aýyl mektebinde boldy. Mektep direktory Jámila Qasenovanyń aitýynsha, búginde bilim oshaǵynda 204 oqýshy tálim-tárbie alýda. Onyń ishinde Bógenbai bi aýylynda turatyn 13 oqýshy kúndelikti shaǵyn avtobýspen tasymaldanady. Kóp balaly jáne turmysy tómen otbasyndaǵy 59 bala tegin ystyq tamaqpen qamtylǵan.
Al, mádeniet úiin aralap, turǵyndarmen kezdesken vitse-premer QR Prezidenti Qasym-Jomart Toqaevtyń Qazaqstan halqyna Joldaýynyń basty baǵyttaryn túsindirdi.
Atap aitqanda, vitse-premer kelesi jyldyń 1 qańtarynan bastap eńgiziletin kópbalaly jáne muqtaj otbasylarǵa arnalǵan kómektiń jańa ádisi turaly aitty.
Aýyl turǵyndary zeinetkerlik jáne turǵyn úimen qamtamasyz etý, muqtaj otbasylarǵa áleýmettik kómek kórsetý, jumysqa ornalastyrý, memlekettik qoldaý sharalaryn kórsetý jáne basqa da máselelerdi sheshýge qatysty kókeidegi saýaldaryn qoiyp, jaýap aldy.
Kezdesýde 1247 adam tirshilik keship jatqan Viktorovka aýylynyń turǵyndary kótergen basty másele, bir ortalyqtandyrylǵan aýyz sýmen qamtamasyz etý boldy.
«Búgingi kúni aýyldaǵy basty másele – aýyz sý. Bul týraly aitylǵany neshe jyl. Áli sheshiletin emes. Jergilikti sharýashylyq sýdy turǵyndarǵa tasymaldap jetkizip beredi. Biraq, ol búkil aýyldy sýmen qamtamasyz etý jetkiliksiz. Osy máseleniń sheshilýine atsalyssańyz», - dedi aýyl turǵyny Liýbov Beriýkova.
Osy rette, vitse-premer turǵyndardyń saýalyn tyńdai kele, bul máseleniń aldaǵy ýaqytta sheshiletinin aitty.
«Aýyz sý máselesi bizge belgili. Sý qubyryn tartý úshin tiisti qujattardy daiyndaý qajet. Onyń quny shamamen 300 million teńge shamasynda. Ony Úkimet pen oblys ákimdigi birlesip sheshetin bolady», - dep jaýap berdi B. Saparbaev turǵyndardyń saýalyna orai.
