Vetnamnyń ortalyq aýdandarynda nóser jaýynnan týyndaǵan sý tasqyny men kóshkin saldarynan 36 adam mert bolyp, 12 turǵyn iz-túzsiz joǵalyp ketti, dep habarlaidy "Ult aqparat".
Vetnamdyq VnExpress onlain-gazetiniń jazýynsha, 11 qazan kúni tańerteń «Linfa» daýyly soǵyp, nóser jańbyr jaýǵan, saldarynan Vetnamnyń ortalyǵynda sý tasqyny kúsheidi. Kóz jumǵandardyń kópshiligi eń qatty zardap shekken Kýangchi, Thyathen-Hiýe jáne Kýangnam provintsiialarynyń turǵyndary.
14 qazanda kúndiz Vetnamnyń soltústik-ortalyq aýdanyna «Nangka» daýyly soǵady dep boljanǵandyqtan, bilik ókilderi áýejai men jaǵjailardy jabý týraly sheshim qabyldady. Vetnamnyń azamattyq aviatsiia basqarmasy Ngean provintsiiasyndaǵy Vin áýejaiy men Thanhoa provintsiiasyndaǵy Tho Sýan áýejaiy 14 qazanda jergilikti ýaqytpen tús mezgilinen 21.00-ge deiin jabyq bolatynyn eskertti.
Biyl Vetnamda qýatty taifýn, sozylmaly jaýyn-shashyn men sý tasqyny 98 adamnyń ómirin qidy, tabiǵat apaty elge $217 mln-ǵa jýyq ekonomikalyq shyǵyn ákeldi.
