Foto: AFP
Vetnamda tolassyz jaýǵan jańbyr men sý tasqynynan keminde 41 adam qaza tapty, dep habarlaidy Ult.kz BBC-ge silteme jasap.
Memlekettik BAQ dereginshe, ortalyq óńirlerdi birneshe kún boiy toqtaýsyz jaýǵan nóser basyp, 9 adam áli iz-túzsiz joǵalǵan. Sý tasqyny saldarynan 52 myńnan astam úi sý astynda qaldy, al 500 myńǵa jýyq úi men kásiporyn jaryqsyz otyr. On myńdaǵan turǵyn qaýipsiz aimaqtarǵa shuǵyl evakýatsiialandy.
Sońǵy úsh kúnde kei óńirlerdegi jaýyn-shashyn kólemi 1,5 metrden asyp, tipti kei aimaqtarda 1993 jylǵy tarihi 5,2 metrlik sý deńgeiinen joǵarylaǵan.
Bul – sońǵy ailarda Vetnamdy sharpyǵan tabiǵi apattardyń jalǵasy. Buǵan deiin el aýmaǵynda soqqan Kalmaegi jáne Bualoi taifýndary úlken shyǵyn ákelgen edi.
Úkimet deregine súiensek, biyl qańtar-qazan ailary aralyǵynda tabiǵi apattar elge 2 mlrd dollardan astam materialdyq shyǵyn keltirgen.
Sý tasqyny Vetnamnyń ortalyq taýly aimaǵyndaǵy iri kofe óndirý beldeýine de aýyr soqqy boldy. Dak Lak provintsiiasynda ondaǵan myń úi sý astynda qalyp, fermerler buǵan deiingi daýyldardan keiin de toqtap qalǵan kofe jinaý jumystaryna qaita kirise almai otyr. Vetnam — álemdegi robýsta sortyndaǵy kofeniń jetekshi eksporttaýshylarynyń biri.
Bilik ókilderi apatty aýa raiy kem degende jeksenbige deiin sozylýy múmkin ekenin eskertti. Áskeri bólimder men politsiia turǵyndardy qaýipsiz jerge kóshirý úshin jedel evakýatsiialyq ortalyqtar uiymdastyrýda.
