QR Aýyl sharýashylyǵy ministrligi Veterinariialyq baqylaý jáne qadaǵalaý komitetiniń laýazymdy tulǵalary kásipkerlerden maldy shekaradan kedergisiz shyǵarǵany úshin para alýdyń sybailas jemqorlyq shemasyn uiymdastyrǵan. Bul týraly Sybailas jemqorlyqqa qarsy is-qimyl agenttiginiń baspasóz qyzmeti habarlady.
Vedomstvonyń málimeti boiynsha, 2021 jyldyń maýsym aiynan bastap agenttik ókilderi Prezidenttiń tapsyrmasy boiynsha agroónerkásiptik kesheninde sýbsidiialaý salasyna aýqymdy taldaý júrgizip jatyr.
Sol arqyly sýbsidiia berýdiń ashyq, ádil júiesin qamtamasyz etý, sybailas jemqorlyq pen biýrokratiia deńgeiin tómendetý, biznes júrgizýge kedergi keltiretin ákimshilik kedergilerdi joiý kózdelip otyr.
«Taldaý aiasynda Veterinarlyq baqylaý jáne qadaǵalaý komiteti men onyń aýmaqtyq inspektsiialarynyń laýazymdy tulǵalarynyń áreketinen uiymdasqan qylmystyq toptyń belgileri anyqtaldy. Atalǵan top kásipkerlerden maldy shekaradan kedergisiz shyǵarǵany úshin júieli túrde para alýǵa múmkindik beretin sybailas jemqorlyq shemasyn uiymdastyrǵan. Bul rette memleket sýbsidiialaǵan asyl tuqymdy maldy áketý, janýarlardy epizootiialyq baqylaýsyz tasymaldaý faktileri anyqtaldy. Saldarynan epidemiologiialyq jaǵdaiǵa teris áser kelýi múmkin», - dep jazady agenttiktiń baspasóz qyzmeti.
Antikordyń málimetinshe, qylmystyq toptyń ár múshesi óz «mindetin» múltiksiz oryndap otyrǵan.
«Qoldanystaǵy erejeler boiynsha eksportqa nemese importqa ruqsatty beiindi komitettiń basshysy ǵana bere alady. Jemqorlyq shemasy boiynsha komitettiń eki bas sarapshysy osy quzyretke zańsyz ie bolǵan. Qylmystyq shemaǵa Túrkistan, Jambyl, Aqtóbe jáne Qostanai oblystary, Almaty jáne Shymkent qalalary boiynsha óńirlik inspektsiialardyń inspektorlary da tartylǵan. Árbir ruqsat úshin top qatysýshylarynyń nemese olardyń týystarynyń jeke kartalaryna 10-nan 50 myń teńgege deiin aqsha aýdarylyp otyrǵan. Máselen, tek Túrkistan oblysy boiynsha komitettiń aýmaqtyq inspektsiiasyndaǵy bas mamannyń shotyna 2020 jyldan bastap 45 mln teńgeden astam qarjy túsken. Komitet bas sarapshysynyń áieliniń kartasyna 13,5 mln teńgeden astam qarajat túsken», - delingen agentttiktiń baspasóz qyzmeti taratqan aqparatta.
25 tamyzda bastalǵan arnaiy operatsiianyń qorytyndysy boiynsha 10-nan astam laýazymdy tulǵaǵa aiyp taǵylyp otyr.
«Olardyń kóbi kinásin moiyndady. Úsh aiyptalýshyǵa, onyń ishinde komitettiń ortalyq apparat qyzmetkerleri qamaýǵa alynǵan. Tergeý jalǵasýda», - delingen resmi málimette.
