Ońtústik Qazaqstan oblysynyń ákimi Janseiit Túimebaev Vengriiadan kelgen bir top delegatsiiamen kezdesti, dep habarlaidy "Ult aqparat" OQO ákiminiń baspasóz qyzmetine silteme jasap.
Delegatsiia quramynda Ias Nadkýn Solniýk aimaǵynyń májilis tóraǵasy Shandor Kovach, Vengriianyń Almatydaǵy bas konsýly Blaýmann Ferents, Vengriianyń Qazaqstandaǵy qurmetti konsýly Laslo Horvat bar.
Kezdesý barysynda taraptar saýda-ekonomikalyq, áleýmettik-gýmanitarlyq, mádeni bailanystar tóńireginde áńgime órbitip, pikir almasty.
Óńir basshysy qonaqtarǵa Ońtústik Qazaqstan oblysynyń ekonomikalyq damý qarqynyn baiandap, sheteldik investorlarǵa kórsetiletin barlyq jeńildikterdi túsindirdi.
«Ońtústik Qazaqstan oblysy – agrarly óńir. Bizde jylyna 300 myń tonna maqta óndiriledi. Óńirde negizinen aýyl sharýashylyǵy salasyna basymdyq berilgen. Oblys jemis-jidek, kókónis, baý-baqsha ónimderin óndiredi. Aýmaqtyń indýstrialdy áleýeti jyl sanap jaqsaryp, búginde 11 indýstrialdy, 1 ekonomikalyq arnaiy aimaǵymyz jumys isteidi. Atalǵan aimaqtarda infraqurylymdyq qajettelikter tolyǵymen qamtamasyz etilip, sheteldik investorlarǵa barlyq jeńildikter qarastyrylǵan», - dedi Janseiit Túimebaev.
Al vengrlik meimandar eki el arasyndaǵy qarym-qatynastyń odan ári dami túsetinine senim bildirdi. Keleshekte mádeni-gýmanitarlyq, saýda-ekonomikalyq qarym-qatynastardy jandandyryp, ásirese aýyl sharýashylyǵy salasynda tyǵyz jumys isteýge nietti ekendikterin jetkizdi.
«Vengriia - Qazaqstannyń mańyzdy saýda-ekonomikalyq áriptesi. Eki el arasynda Qazaqstan-Vengriia strategiialyq keńesi, ekonomikalyq yntymaqtasyq jónindegi úkimetaralyq komissiia, Iskerlik keńes, sondai-aq, tikelei investitsiialar boiynsha Qazaqstan men Vengriianyń birlesken qory jumys isteidi. Osy múmkindikterdi paidalanyp, Ońtústik Qazaqstan oblysynda birlesken kásiporyndar qurý týraly kelisimder júrgizetin ýaqyt jetti. Bul qadamdar eki el arasyndaǵy ózara qarym-qatynasty odan ári arttyrary sózsiz», - dedi Vengriianyń Almatydaǵy bas konsýly Blaýmann Ferents.
Aita keteiik, Ońtústik Qazaqstan oblysymen men Vengriianyń saýda-sattyq bailanysy 2017 jyldyń birinshi jarty jyldyǵynda 1 mln AQSh dollaryn qurady. 2017 jyldyń 28 qańtary kúni óńirimizge Vengriianyń syrty ekonomikalyq bailanys jáne syrtqy ister ministrliginiń memlekettik hatshysy Mikola Ishtvanai men Vengriianyń Qazaqstandaǵy elshisi Andrash Barani arnaiy kelgen bolatyn. Sol kezde Shymkentte Vengriianyń qurmetti konsýldyǵy ashylyp, qurmetti konsýl bolyp Qairat Moldaseiitov taǵaiyndalǵan edi. Búgingi kezdesýdiń qorytyndysynda qonaqtar oblys basshysyna Vengriiaǵa arnaiy kelip-ketýdi usyndy.
