Vengriia astanasynyń ortalyǵynda Qytaidaǵy ótkir máselelerge nazar aýdaratyn birneshe kóshe paida boldy. Ferentsvarosh aýdanynda Azap shegýshi uiǵyrlar, erkin Gonkong, Dalai-lama jáne qytailyq dissident Se Shigýan atyndaǵy kósheler paida boldy. Bul týraly Azattyqtyń Venger qyzmeti habarlady.
Atalǵan kósheler Qytaidyń Fýdan ýniversitetiniń kampýsy salynýy tiis aýdanda ornalasqan. Kósheni ashý rásimine aýdan meri Krisztina Baraii men qala meri Gergeli Karachoni qatysty. Jurt aldynda sóilegen Baraii aýdan men qala venger úkimetiniń qytai ýniversitetin ornalastyrý týraly sheshimine osylaisha qarsylyq bildiretinin jetkizdi.
Býdapesht ortalyǵynda Fýdan ýniversitetiniń ókildigin ashý máselesi birneshe aidan beri talqylanyp keledi. Bul sheshimdi oppozitsiia ótkir synaǵan. Aqparatqa qaraǵanda, vengr úkimeti jobany biýdjet esebinen qarjylandyryp, salýy tiis. Al oppozitsiianyń pikirinshe, ol qytailyq kompartiianyń bólimshesine ainalýy múmkin.
Áleýmettik saýalnama qala turǵyndarynyń 90 paiyzynyń jobaǵa qarsy ekenin kórsetken. Oppozitsiia bul másele boiynsha referendým ótkizýdi de josparlaǵan, alaida ol indetke bailanysty shegerilýi múmkin. Úkimet amerikalyq qarjyger Djordj Soros negizin qalaǵan Eýropa ýniversitetin Býdapeshten ózge elge ornalastyrýǵa mábúrlegennen keiin jaǵdai ýshyqqan.
- Batys elderi Pekindi Shyńjańda uiǵyr jáne ózge de túrkitildi musylmandarǵa genotsid jasady dep aiyptaidy. Pekin muny joqqa shyǵarady.
- Dalai-lama XIV – qýǵyndaǵy Tibet basshysy, tibettik býddizmniń rýhani jetekshisi, onyń jaqtastary 1950 jyly Qytai anneksiialap alǵan Tibetti otar qamytynan bosatýdy talap etedi.
- Erkin Gonkong kóshesi 2020 jyly azamattyq qarsylyq basyp-janshylǵan, halyqaralyq mindettemelerge qaramastan is júzinde Pekinge baǵyna bastaǵan Gonkong qalasynyń qurmetine atalǵan.
- Se Shigýan katolik shirkeýiniń episkopy, din memleketke baǵynady degendi moiyndaýdan bas tartqany úshin 28 jyldan beri túrmede otyrǵan dinbasy.
- Azattyq
