Teńiz deńgeii kútpegen jerden kóterilip, oǵan qatty jel qosylyp Venetsiiadaǵy Áýlie Mark soborynyń eń kóne, tómengi bóligi sý astynda qaldy, dep habarlaidy ANSA agenttigi.
Venetsiiada teńiz deńgeii 122 sm-ge deiin kóterilgen. 130 sm qaýipti dep eseptelgen jáne jergilikti biliktiń aitýynsha, qate boljamdarǵa bailanysty jaqynda tájiribelik negizde kúshine engen «Moisei» qorǵanys júiesi iske qosylmaǵan. Boljam boiynsha sý deńgeii 145 sm-ge deiin kóterilýi múmkin.
Italiiada el boiynsha qolaisyz aýa raiyna qatysty eskertý jariialandy. Ol jeksenbige deiin sozylýy múmkin. Taýlardan kóshkin júrgeni týraly habarlanyp jatqan Veneto, Friýli-Venetsiia-Djýliia, Emiliia-Romania aimaqtary, sondai-aq ońtústik Kampaniia jáne Sitsiliia araly tabiǵat apatynan kóbirek zardap shekti.
Appeninniń ortalyǵy men soltústigine qatty daýyl soǵyp, nóser jańbyr jaýdy. Bul óńirde de tasqyn men sý deńgeiiniń kóterilgeni týraly habarlanyp jatyr. Soltústikte tipti 600-800 metr biiktikke qar túsken.
Seisenbi kúni meteoeskertýdiń eń joǵary «qyzyl» dárejesi jariialanǵan Latsiodaǵy Tibr ózeniniń sý deńgeii baqylaýǵa alyndy.
