Velosporttan Qazaqstan komandasynyń bas bapkeri Asan Bazaev Tokio Olimpiadasynda el namysyn kimderdiń qorǵaityny týraly aitty, dep habarlaidy "Ult aqparat".
Halyqaralyq velosport federatsiiasynyń qorytyndy reitingi boiynsha, Qazaqstan komandasy tas joldaǵy velojarystan úsh litsenziia, trektegi velosporttan eki joldama jeńip alǵan bolatyn.
Atap aitar bolsaq, tas joldaǵy velojarysta el namysyn Aleksei Lýtsenko, Dmitrii Grýzdev jáne Vadim Pronskii qorǵasa, trektegi velosporttan Artem Zaharov pen Sergei Ponomarev synǵa túsedi.
Tas joldaǵy velojarysta Qazaqstan komandasynyń kapitany mindetin Aleksei Lýtsenko atqarady. Dmitrii Grýzdev pen Vadim Pronskii de el namysyn qorǵaidy
Aita keteiik, upai jinaý kezeńderi 2018 jyldyń 22 qazany men 2019 jyldyń 22 qazany aralyǵyn qamtydy. Qorytyndy esepte bizdiń komanda 3259,35 upaimen 19-shy orynǵa taban tiredi. Bul rette 2019 jyly Qazaqstan qorjynyn mańyzdy upailarmen toltyrǵan Aleksei Lýtsenkonyń eńbegi erekshe ekenin atap ótý kerek.
Sondai-aq, qazaqstandyq veloshabandozdar Aziia birinshiliginde úsh altyn alyp, komanda reitingine 555 upai qosty. Osylaisha, 2004 jyldan beri alǵash ret toptyq synda Qazaqstan atynan úsh sportshy baq synaidy.
Olimpiada oiyndarynda erler arasyndaǵy báseke 24 shilde kúni toptyq jaryspen bastalady. Jarysqa 130 sportshy qatyspaq. Al jekelei synda Aleksei Lýtsenko baq synaidy.
Tokio Olimpiadasynda trektegi velosport dodasy 1 tamyzda bastalady.
