Ǵalymbek Kenjebaev bastaǵan bokstan ulttyq quramanyń barlyq bapkerlerine sógis jariialandy, dep habarlaidy "Ult aqparat" Qazaqstan boks federatsiiasyna silteme jasap.
Bul sheshimdi Qazaqstan boks federatsiiasynyń jattyqtyrýshylar shtaby Ekaterinbýrgtegi Álem chempionat nátijelerin saraptai otyryp qabyldady.
Levittiń sekýndanttary aiqastyń nátijesine narazylyq bildirýi kerek edi. Erejege sáikes, jattyqtyrýshylar tóreshilerge jekpe-jekten keiin 60 sekýnd ishinde sary qaǵaz berýi tiis. Biraq sekýndandtar bul quqyqty birden paidalanbai, ýaqyt joǵaltyp alǵan.
«Biz barlyq jeke bapkerlerdi jáne federatsiia basshylaryn shaqyryp aldyq. Olarǵa federatsiia osyndai jaǵdaida ne isteýi, jattyqtyrýshylar ne isteýi kerektigin aittyq. Bolashaqta qatelikter qaitalanbaýy kerek. Biz budan arǵy is-qimyl josparyn daiyndaimyz. Kóp jumys isteý kerek, ýaqyt az. 2020 jylǵy Jazǵy Olimpiadanyń litsenziialyq týrnirine tórt ai qaldy. Bizdiń barlyǵymyzda - boksshylar, jattyqtyrýshylar jáne federatsiiaǵa úlken jaýapkershilik artylyp otyr, - dedi Qazaqstan boks federatsiiasynyń jattyqtyrýshylar quramymen jumys jónindegi vitse-prezidenti Iýrii Tshai.
Jalpy, bapkerler shtaby álem kýbogyndaǵy komandanyń nátijesin oń baǵalaǵan. 26 qarashada birneshe sportshy - Sáken Bibosynov, Sanatáli Tóltaev, Aibek Oralbai, Rimma Volosenko Japoniiaǵa testtik týrnirge barady. Ol týrnirdiń nátijeleri Olimpiadanyń irikteýi retinde eseptelmeidi. Týrnir japondyq tarap ótkizedi.
Sonymen qatar, 2019 jyldyń aiaǵynda erler komandasy 10 qarashada Gollandiia quramasymen jekpe-jek ótkizip, birlesken jattyǵý jasaý úshin Niderlandyǵa barady. Jeltoqsanda bizdiń boksshylar elimizde oqý-jattyǵý jiyndaryn ótkizse, kelesi jyldyń aqpan aiynda olar Aziia kvalifikatsiialyq týrnirinde Olimpiadalyq litsenziia úshin Qytaida sharshy alańǵa shyǵady.
Eske salsaq, ÁCh-niń jartylai finalynda Vasilii Levittiń aiqasynda tóreshiler ekvadorlyq boksshynyń jeńisine kúmándi sheshim qabyldaǵan bolatyn.
