Demokratiialyq partiia ókili Djo Baiden AQSh prezidenti bolyp sailanǵanyn jariialaǵannan bir apta ótken soń, 14 qarashada, Amerika astanasynda respýblikalyq partiia ókili, qazirgi prezidenti Donald Trampty jaqtaityn ondaǵan myń adamnyń sherýi ótti. Jurt sailaý nátijesimen kelispeitinin aitty jáne Tramptyń "daýystar urlandy" degen negizsiz málimdemesin qaitalady.
Tramp shtabynyń jalaýyn kóterip, "Amerikany qaitadan uly el eteiik" (MAGA) degen bas kiim kigen demonstranttar Vashingtondaǵy Aq úi aldyndaǵy alańnan bastap Pensilvaniia aveniýmen Joǵary sot ǵimaratyna deiin júrip ótti. "AQSh, AQSh!", "Taǵy tórt jyl!" dep urandaǵan demonstranttar sailaý nátjesimen kelispeitinin aitty. Bul shara áleýmettik jelide kóp jarnamalandy jáne búkil Amerika turǵyndarynyń nazaryn aýdartty.
Tramp sherý týraly týit jazyp, "aqparat quraldary bul oqiǵany kórsetip jatqan joq" dep negizsiz málimdeme jasady. Sherýdiń basynda ol prezident kortejimen júrip ótip, jinalǵan jurtqa limýzin ishinen qol bulǵap, qoshemet kórsetti.
Proud Boys degen ońshyl toptar da qatysqan sherý beibit túrde ótti, tek keshke qarai qarsy pikirdegi jurttyń mitingisi bastalǵanda birshama shielenisti.
Baidenniń jeńisine qarsy jurttyń demonstratsiiasy Florida, Michigan, Arizona shtattarynda da ótti.
Baiden sailaýshylar alqasynyń AQSh prezidenti bolyp sailanýǵa jetkilikti 270 daýys mejesinen asyp tústi dep jariialanǵanyna qaramastan, Tramp daýys berý nátijesin moiyndamai otyr.
Eldegi sailaý komissiialary óreskel zań buzý týraly aqparat joq degenimen, Tramptyń zańgerleri jer-jerde nátijege narazylyq bildirip, aryz berdi.
