Vashingtonda Qazaqstan men AQSh arasyndaǵy keńeitilgen strategiialyq seriktestik talqylandy, dep habarlaidy "Ult aqparat" Syrtqy ister ministrliginiń baspasóz qyzmetine silteme jasap.
Qazaqstandyq delegatsiianyń Vashingtonǵa sapary barysynda Qazaqstan men AQSh arasyndaǵy keńeitilgen strategiialyq seriktestik jónindegi komissiianyń saiasi, ekonomikalyq jáne gýmanitarlyq máseleler jónindegi komitetteriniń otyrysy ótti.
«Komissiia jumysyna teń tóraǵalar retinde Qazaqstan Respýblikasy Syrtqy ister ministriniń orynbasary Erjan Ashyqbaev jáne Memlekettik hatshynyń Ońtústik jáne Ortalyq Aziia isteri jónindegi birinshi orynbasary Elis Ýells qatysty. Qazaqstandyq delegatsiia quramyna ishki ister, ulttyq ekonomika, saýda jáne integratsiia, aqparattyq jáne áleýmettik damý, eńbek jáne halyqty áleýmettik qorǵaý jáne ádilet ministrlikteriniń ókilderi kirdi» delingen habarlamada.
Komissiia otyrysynyń negizgi maqsaty - ekijaqty yntymaqtastyqtyń qazirgi jaǵdaiyn jáne Qazaqstan men Amerika Qurama Shtattary arasyndaǵy strategiialyq seriktestiktiń bolashaǵyn anyqtaý boldy.
Is-sharanyń kún tártibi jahandyq jáne aimaqtyq qaýipsizdik salasyndaǵy yntymaqtastyq, lańkestik pen esirtki biznesine qarsy is-qimyl, Siriia men Iraktaǵy soǵys aimaqtarynan Qazaqstan azamattarynyń repatriatsiiasy jáne reintegratsiiasy siiaqty kóptegen taqyryptardy qamtydy. Kiberqaýipsizdik, saýda-ekonomikalyq jáne investitsiialyq yntymaqtastyq, Ortalyq Aziiadaǵy aimaqtyq saýda qatynastaryn nyǵaitý, halyqaralyq uiymdar sheńberindegi ózara is-qimyl, gýmanitarlyq ólshem men adam quqyqtary salasyndaǵy yntymaqtastyq ta qarastyrylady.
Komissiiaǵa qatysýshylar Qazaqstan ekonomikasyn ártaraptandyrý jolynda iskerlik seriktestikti odan ári tereńdetýdiń, atap aitqanda ónerkásiptik óndiris, aýylsharýashylyǵy, densaýlyq saqtaý jáne qarjy salalarynda mańyzdylyǵyn atap ótti.
«Sonymen qatar, ekijaqty saýda, onyń ishinde Jalpy preferentsiialar júiesi aiasynda keńeitý máseleleri talqylandy. Taraptar ekijaqty ǵylymi-tehnikalyq yntymaqtastyq jónindegi komissiianyń jumysyn jandandyrýdyń mańyzdylyǵyn atap ótti. Qazaqstanda DSU ministrlik kezdesýine daiyndyq kezinde yntymaqtastyq ornatý týraly, sondai-aq Qazaqstannyń EYDU-ǵa kirýi týraly kelisimge qol jetkizildi» dep málim etti vedomstvodan.
Gýmanitarlyq ólshemder jónindegi komitettiń otyrysynda bilim berý jáne mádeniet salasyndaǵy yntymaqtastyqty qurý, BAQ-ty damytý jáne qazaqstandyq úkimettik emes sektordy qoldaý joldary qarastyryldy. Amerikandyq tarap Qazaqstannyń osy baǵyttardaǵy kúsh-jigerin joǵary baǵalady.
