Foto: Pexels.com
Qazaqstan Respýblikasynyń Qarjy ministrligi Memlekettik kirister komitetiniń málimetinshe, tsifrlyq qyzmetter salyǵy engizilgen sátten bastap sheteldik internet-kompaniialar el biýdjetine jalpy 118,4 mlrd teńge aýdarǵan, dep habarlaidy Ult.kz.
Bul salyq tetigi 2022 jylǵy 1 qańtardan bastap qoldanysqa engizilgen. Ol qazaqstandyq paidalanýshylarǵa elektrondyq qyzmet kórsetetin nemese internet arqyly taýar satatyn sheteldik kompaniialarǵa qatysty. Mundai kompaniialar Qazaqstanda tirkelip, qosylǵan qun salyǵyn (QQS) 12% mólsherlememen tóleýge mindetti.
Memlekettik kirister komitetiniń málimetinshe, búginde Qazaqstanda 118 sheteldik rezident emes kompaniia esepke qoiylǵan. Olardyń qatarynda álemdik iri platformalar bar. 2025 jyly bul tizimge taǵy 20 jańa kompaniia qosyldy. Olardyń ishinde:
-
Chess.com – shahmat áýesqoilaryna arnalǵan halyqaralyq platforma;
-
OpenAI, L.L.C. – ChatGPT servisiniń ázirleýshisi;
-
Canva Pty Ltd. – onlain-dizain quraly;
-
Microsoft Ireland Operations Limited – Microsoft kompaniiasynyń bólimshesi;
-
Canyon Bicycles GmbH – kásibi velosiped óndirýshisi.
2025 jyly sheteldik tsifrlyq kompaniialardan 48,6 mlrd teńge salyq túsken. Bul ótken jylmen salystyrǵanda 20 mlrd teńgege artyq.
Eń iri QQS tóleýshilerdiń úshtigine:
-
Valve Corporation – 8,6 mlrd ₸,
-
Apple – 8 mlrd ₸,
-
Temu – 6,2 mlrd ₸ kirdi.
Mundai tájiribe kóptegen elderde qoldanylýda. Mysaly, Eýropalyq Odaqta biryńǵai e-VAT júiesi, Ulybritaniia, Kanada jáne Úndistanda arnaiy tsifrlyq salyq bar. Al Qazaqstannyń modeli EYDU usynymdaryna jáne jahandyq úzdik tájiribelerge sáikes keledi.
Óńir elderi de uqsas saiasat ustanýda:
-
Ózbekstan – 2020 jyldan beri 12% QQS alady,
-
Qyrǵyzstan – 2022 jyldan bastap osy rejimdi engizgen,
-
Resei – 2024 jyldan bastap 18% QQS mólsherlemesin bekitti.
Memlekettik kirister komiteti bul bastama tsifrlyq ekonomikadaǵy ádil salyq júiesin qalyptastyryp, sheteldik kompaniialardyń qyzmetin ashyq etýge múmkindik bergenin atap ótti.
Osylaisha, «tsifrlyq QQS» engizý Qazaqstandy tsifrlyq salany tiimdi retteitin elderdiń qataryna qosty.
