Jambyl oblysy ákimdiginde ótken apparattyq keńeste koronavirýstyń aldyn alý máselesi qaraldy, dep habarlaidy "Ult aqparat".
Jiynda vaktsinatsiia sharalary jáne epidemiologiialyq jaǵdai boiynsha oblys ákimdigi densaýlyq saqtaý basqarmasynyń basshysy Áset Qalievtiń esebi tyńdaldy.
Onyń málimetinshe, búginde Taraz qalasy, Talas, Shý, Qordai, Jambyl, Jýaly, Merke, Sarysý, T.Rysqulov, Moiynqum aýdandary - áli de qyzyl aimaqta.
Baizaq aýdany ǵana sary aimaqqa ótken. 31 tamyzǵa deiin óńirde jalpy COVID-19 indetin 17 934 adam juqtyrǵan. Al pnevmoniianyń 6 865 jaǵdaiy tirkelgen.
Sońǵy táýlikte KVI-men 35 azamat aýyrsa, pnevmoniiamen 11 naýqas aýrýhanaǵa túsipti. Jalpy, 15 024 adam saýyǵyp shyqqan.
«Biylǵy 16-23 tamyz ben 24-31 tamyz aralyǵyndaǵy dinamikaǵa kóz júgirtsek, KVI belgileri bar naýqastar sany azaiǵanyn kóremiz. Qazirgi tańda oblystaǵy aýrýhanalarda 3 634 infektsiialyq, 416 reanimatsiialyq tósek qory, oǵan qosa 170 orynǵa arnalǵan karantindik statsionarlar jumys istep jatyr. Epidemiologiialyq jaǵdaiǵa bailanysty qosymsha rezerv retinde 1 126 infektsiialyq, 85 reanimatsiialyq tósek qory ashylyp, jumyldyrylatyn bolady. Qazir infektsiialyq statsionarlarda – 1 780, jansaqtaý bóliminde 161 naýqas em qabyldap jatyr. Karantindik statsionarlarǵa 43 adam ornalastyrylǵan. Olardyń densaýlyq jaǵdaiy turaqty baqylaýda», - dedi basqarma basshysy.
Áset Qaliev aimaqtaǵy 18 jastan joǵary 582 000 adamnyń ekpe alýy qajettigin jetkizip, búginde 377 068 azamat vaktsina qabyldaǵanyn málimdedi.
Jalpy, oblys boiynsha 23 meditsinalyq uiymda 43 egý pýnkti bar. Olardyń 15-i qalada, 28-i aýdandarda ornalasqan.
Aǵymdaǵy jyldyń aqpanynan beri oblysqa 16 990 doza QazCovid-in, 341 700 doza Spýtnik V vaktsinasynyń birinshi komponenti jáne 258 060 doza ekinshi komponenti, 60 000 doza «Haiat Vak», 34 000 doza «KoronaVak» ekpesi keldi.
Jiyn barysynda aimaq basshysy Berdibek Saparbaev Shý, Qordai aýdandary men Taraz qalasynyń ákimderine taǵy da eskertý jasap, vaktsinatsiia baǵytyndaǵy sharýalardy jedeldetýdi mindettedi.
«Indet órship tur. Al ekpe indettiń aldyn alady. Endeshe nege bul máselege salǵyrt qaraisyńdar?! Ekpemen qamtý – memlekettiń tapsyrmasy, turǵyndardyń densaýlyǵynyń kepili. Vaktsinatsiia kórsetkishi tómen Shý qalasy ákimin ornynan alýdy tapsyramyn. Eger sharýany shiratpasa, aýyl ákimderine de osyndai shara qoldanýǵa májbúr bolamyz», - dedi oblys ákimi.
