Astanalyq emizýli ana Alfiia Álibekova alǵashqylardyń biri bolyp koronavirýsqa qarsy ekpe saldyrdy. Jáne jas ana ózin jaqsy sezinetinin aitty, habarlaidy QazAqparat.
«Meniń jasym 26-da, 7 ailyq balam bar, iaǵni emizýli anamyn. Koronavirýspen álem bolyp kúresip jatqanyn jáne onyń qanshalyqty tez taraitynyn bárimiz bilip otyrmyz. Osy oraida ózim úshin ǵana emes, balamnyń da qaýipsizdigi úshin aldym. Negizi koronavirýsqa qarsy vaktsinany Qazaqstanǵa alǵash alyp kelgende-aq saldyrǵym kelgen, men ol kezde júkti bolǵandyqtan ruqsat berilmedi. Keiin elimizge Pfizer ekpesin ákeledi jáne ony emizýli analarǵa alýǵa bolady degen habardy estidim. Pfizer jetkizilgen soń emhanaǵa habarlasyp, mine, búgin alyp otyrmyn. Mende atalǵan indettiń alǵashqy simptomdary boldy, biraq aýyrǵan emespin», - dedi Alfiia Álibekova.
Onyń aitýynsha, jaqyndary men týystarynyń deni ekpe saldyrǵan.
«Árine, vaktsina almas buryn dárigerlerden, onyń ishinde pediatrdan keńes aldym. Jáne maǵan vaktsina alýǵa qatysty esh qysym nemese úgit bolǵan joq. Óz erkimmen alyp jatyrmyn. Qazir ózimdi ádettegidei sezinip turmyn, balamdy emizýdi jalǵastyramyn. Basynda qalai bolady eken, aýyrmai ma degen úreidiń bolǵany ras. Pfizer saldyrǵan sebebim - bala emizetin anaǵa ruqsaty bar, áitpese QazVac saldyrsam degem. Sebebi óz basym otandyq ǵalymdarǵa senemin. Ózim sekildi emizýli analarǵa vaktsina alýǵa keńes beremin», - deidi ol.
