QR klinikalyq jáne irgeli meditsina akademigi, Asfendiiarov atyndaǵy QazUMÝ epidemiologiia kafedrasynyń jáne Qazaq meditsinalyq úzdiksiz bilim berý ýniversitetiniń professory Sáken Ámireev onlain brifing barysynda vaktsinatsiialaý isine qatysty oiyn aitty, dep habarlaidy QazAqparat.
Onyń aitýynsha, kez kelgen vaktsina shyǵarý isinde aldymen onyń qaýipsizdigi men qorǵanysh qasietine kóńil bólinedi.
«Qazir birneshe memlekette koronavirýsqa qarsy vaktsina shyǵarylyp jatyr. Sonyń ishinde Resei tórt túrli vaktsina, al Qazaqstan bir vaktsinany óndirýdi qolǵa aldy. Bul vaktsinalardyń tiimdiligi qandai degenge kelsek, jalpy kez kelgen vaktsinaǵa qaýipsizdigi men qorǵanysh qasieti jaily shart qoiylady. Qaýipsizdik máselesi óte mańyzdy. Keide óte sirek bolsa da, onyń asqynýlaryn baiqaýǵa bolady», - deidi ol.
Sonymen qatar ol halyqqa qazirgi vaktsinalaý isin jan-jaqty túsindirý qajettiligin aitty.
«Koronavirýsqa qarsy vaktsina jaqynda shyqqandyqtan halyq arasynda oǵan qatysty suraqtyń týyndaýy zańdy. Ony biz durys túsindire bilýimiz kerek. Degenmen qorqatyn eshteńe joq. Bul vaktsinany jasamasaq, halyqtyń kópshiligin qorǵai almaimyz. Qazir álem boiynsha osy vaktsinamen ǵana qorǵana alamyz degen qaǵida qabyldandy. Oǵan qosa bul vaktsina qansha ýaqytqa deiin saqtaidy degen suraqtar týyndaýda. Oǵan jaýap berý úshin biraz ýaqyt kerek», - deidi professor.
Epidemiologtyń sózinshe, vaktsinanyń arqasynda ujymdyq immýnitet qalyptasady. Iaǵni, pandemiia tómendeidi.
«Ózderińiz bilesizder, kóptegen infektsiialyq aýrýlardy tek vaktsinalardyń kómegimen jeńdi. Sondyqtan biz ýaqytynda vaktsinatsiiadan ótýimiz kerek. Adamdar vaktsina alýdan qorqady. Pandemiiany toqtatý úshin halyqtyń 95% vaktsinatsiiadan ótýi kerek. Bul virýsty vaktsinasyz toqtatý múmkin emes», - deidi spiker.
