«Soltústik Qazaqstan oblysy Timiriazev eldi mekeninde vaktsina alǵan oqýshylar sabaq ústinde aýyryp qaldy» degen feik-aqparat áleýmettik jelide tarap ketti, dep habarlaidy QazAqparat.
WhatsApp jelisi arqyly taraǵan aqparatqa súiensek, SQO Timiriazev aýdany Timiriazev eldi mekeninde koronavirýsqa qarsy vaktsina alǵan 4 oqýshynyń ekeýi sabaq ústinde aýyryp qalǵan. Jazba iesiniń aitýynsha, mektepte 400 oqýshy bar, sonyń tek tórteýi ǵana ekpe alýǵa kelisken.
SQO Densaýlyq saqtaý basqarmasy baspasóz qyzmeti bul aqparattyń shyndyqqa janaspaitynyn habarlady. Máselen, 21 qarasha kúni Timiriazev aýdanynda 9 jasóspirim ekpe alǵan. Olardyń barlyǵynyń jaǵdaiy jaqsy, densaýlyqtaryna shaǵymdanǵandar bolmaǵan.
Jalpy, búginge deiin oblysta 571 jasóspirim Pfizer vaktsinasyn qoidyrdy.
