QR Densaýlyq saqtaý ministrligi vaktsinalaý pasportyn satyp alyp, koronavirýspen aýyrǵan naýqastar týraly aitty, dep habarlaidy QazAqparat.
QR DSM Infektsiialyq aýrýlardy epidemiologiialyq qadaǵalaý basqarmasynyń basshysy Roza Qojapovanyń aitýynsha, vaktsina alǵan adamdar da aýyryp qalýy múmkin. Alaida, vaktsina saldyrǵandarda aýrý jeńildeý ótedi.
«Biz juqtyrý jaǵdailary sanyn baqylap otyramyz: vaktsinanyń birinshi dozasyn alǵandar arasynda – 1325 juqtyrý jaǵdaiy, eki doza alǵandar arasynda – 964 jaǵdai tirkelgen. Sondai-aq, biz vaktsina saldyrǵandar arasynda aýrýdyń qalai ótetinin qadaǵalaimyz – aýrýhanaǵa jatqyzylǵandar bar, biraq olardyń kópshiligin ilespe sebepterdiń aýyr bolǵany úshin aýrýhanaǵa jatqyzýda», - dedi spiker Ortalyq kommýnikatsiialar qyzmetinde ótken baspasóz máslihatynda.
Sonymen birge, Qojapova vaktsinalaý pasportyn satyp alyp, aýyr jaǵdaida aýrýhanaǵa túsken naýqas týraly aityp berdi.
«Jansaqtaý bólimine túsý boiynsha da jekelegen jaǵdailar boldy. Mysaly bir adamnyń ekpe saldyrmai, zańnamany buzyp, vaktsinalaý pasportyn alǵany belgili boldy, ony ózi koronavirýs juqtyryp, jaǵdaiy aýyrlaǵanda moiyndady. Vaktsina alǵan naýqastarda juqpanyń aýyr ótýi sirek, tipti tómen kórsetkishte deýge bolady», - deidi Qojapova.
