IIM jyl basynan beri vaktsina pasporty men PTR-anyqtamasyn qoldan jasaý boiynsha 65 qylmystyq is qozǵady, dep habarlaidy "Ult aqparat".
Ishki ister ministrligi taratqan aqparatqa sáikes, Covid-19 koronavirýs infektsiiasy saldarynan kóptegen adamnyń ómiri qiylýda. Tek bir táýlik ishinde Qazaqstanda qaýipti infektsiiaǵa oń PTR-taldaýy bar 5648 naýqas anyqtaldy. Barlyq qabyldanǵan shekteý sharalaryna qaramastan, bul san kún saiyn ósip keledi.
IIM-niń asa alańdatarlyq epidemiologiialyq jaǵdaiyn eskere otyryp, Memleket basshysynyń tapsyrmasy boiynsha osy aýrýmen bailanysty barlyq qylmystyq kórinisterge erekshe kóńil bólinedi.
Jalǵan PTR testileri men vaktsinatsiia pasporttaryn qoldan jasaý jáne paidalanýshylardy anyqtaý baǵytyndaǵy jumystar belsendi júrgizilýde, óitkeni vaktsinatsiialanbaǵan azamattar koronavirýstyń taralýyna jaǵdai jasai jasap, basqalarǵa juqtyrý qaýpin joǵarylatady.
Tergeý bólimsheleriniń óndirisinde PTR-testilerdi qoldan jasaý, daiyndaý nemese ótkizý boiynsha Qylmystyq kodekstiń 385-baby boiynsha 42 qylmystyq is boldy (QK 385-baby 1-bóligi-23, 2-bóligi-3, 3-bóligi-16), onyń ishinde 39-y aǵymdaǵy jyly tirkelgen.
Vaktsina pasportyn qoldan jasaý faktileri boiynsha aǵymdaǵy jyly 23 qylmystyq is tirkeldi, tergeý jalǵasýda.
Qoldan jasalǵan qujattardyń sany jáne árbir is boiynsha zańǵa qaishy áreketterge qatysýshylardyń sany da ár túrli. Bular tergeý nátijeleri boiynsha naqtylanatyn bolady.
Ishki ister organdary jalǵan PTR-anyqtamalar men vaktsina pasportyn satý faktilerin anyqtaý boiynsha túrli jedel-izdestirý is-sharalaryn júrgizýde. Politsiia qyzmetkerleri meditsinalyq ortalyqtardy, emhanalardy, vaktsina alý pýnktterin tekserýdi jalǵastyrýda.
IIM jalǵan qujat jasaǵany úshin 4 jylǵa deiin bas bostandyǵynan aiyrý túrindegi qylmystyq jaýapkershilik, al ony paidalanǵany úshin 40 táýlikke deiin qamaýǵa alý kózdelgenin eske salady.
